Foto: Kun.uz

“Nuroniylarni har tomonlama qoʻllab-quvvatlash, ularning turmush darajasini oshirishga doir qoʻshimcha chora-tadbirlar toʻgʻrisida”gi Prezident qarori qabul qilindi.

Qarorga muvofiq, “Bir nuroniy oʻn yoshga masʼul” tamoyilini qaror toptirishdagi tashabbuskor nuroniylar moddiy va maʼnaviy qoʻllab-quvvatlanadi.

Xodimning pensiya yoshiga toʻlganligi uchun mehnat shartnomasini ish beruvchining tashabbusi bilan bekor qilish taqiqlanadi.

2022-yil 1-apreldan:

• oʻzgalar parvarishiga muhtoj yolgʻiz keksalar va yolgʻiz yashaydigan keksalar har yili bir marotaba sanatoriylarda bepul sogʻlomlashtiriladi;
• sharoiti ogʻir va kam taʼminlangan keksalarga retseptga asosan 3 oylik ehtiyoj asosida dorilar, tibbiy va maxsus protez-ortopediya moslamalari olib beriladi hamda jarrohlik amaliyotlarining xarajatlari qoplanadi;
• ogʻir tashxisli kasal hamda nogiron keksalarga shifokorlar retseptlariga muvofiq, 3 oylik ehtiyojdan kelib chiqib dori vositalarining 50 foizigacha summasi kompensatsiya qilinadi;
• keksalarning jismoniy tarbiya va sport bilan shugʻullanishlari uchun abonement xarajatlari qoplanadi;
• davlat teatrlari va muzeylariga keksalar uchun chipta narxlari toʻliq qoplab beriladi.

2022-yil 1-sentyabrgacha keksalarga oid maʼlumot va yangiliklar ularning mobil telefon raqamlariga SMS orqali maʼlum qilib boriladi.

Mamlakatimizda faol qarish indeksi joriy etiladi.