Foto: president.uz

Prezident raisligida qayta tiklanuvchi energiyadan foydalanishni kengaytirish boʻyicha ustuvor vazifalarga bagʻishlangan yigʻilish boʻlib oʻtmoqda. Bu haqda Prezident matbuot kotibi Sherzod Asadov xabar berdi.

Yigʻilishda ijtimoiy soha obyektlarida ham bosqichma-bosqich muqobil energiya uskunalarini oʻrnatish muhimligi taʼkidlandi.

Mutasaddilarga kelgusi yil Investitsiya dasturi mablagʻlarining kamida 15 foizini shunday qurilmalarni oʻrnatishga yoʻnaltirish topshirildi.

Bunda, yil yakuniga qadar 2 107 ta bogʻchada, 1 ming maktabda, 1 071 ta oilaviy shifokor punkti, poliklinika va shifoxonalarda, 1 ming mahallada tashkil etilayotgan yangi tibbiyot punktlarida, 200 ta sanatoriy va boshqa dam olish maskanlarida quyosh elektr panellari va suv isitish qurilmalari oʻrnatiladi.

Shu bilan birga, 2023-yildan:

— savdo-koʻngilochar komplekslar, madaniyat va istirohat bogʻlari, restoranlar, mehmonxonalar;

— supermarketlar, doʻkonlar, bozorlar, savdo omborlari;

— avtomobillarga gaz va yoqilgʻi quyish stansiyalari;

— aeroport, temir yoʻl va avtobus vokzallari;

— xususiy taʼlim va tibbiyot tashkilotlari;

— tijorat banklari va ularning filiallari kamida 25 foiz issiq suv isteʼmoli va tashqi yoritishni muqobil energiya hisobidan qoplash talabi kiritiladi.