Foto: Xalq so‘zi

Andijon viloyati Qoʻrgʻontepa tumanida istiqomat qiluvchi Moʻydinjon Abdurahimov qishning sovuq kunlarida ham issiqlik taʼminotisiz faoliyat yurituvchi issiqxonaga ega sohibkorlardan biri. U oʻz tomorqasida tashkil etgan issiqxonasida sitrus mevalar yetishtirishning xadisini olgan.

— Issiqxonamizni xitoycha usulda tashkil etganmiz, - deydi Moʻydinjon Abdurahimov. — Yaʼni, yer ostida joylashgan boʻlib, usti ikki qavvat plyonka bilan yopilgan. Tashqarida 20 daraja sovuq boʻlganda ham bu yerda 5 darajadan 15 darajagacha issiqlikni taʼminlash mumkin. Buning uchun hech qanday yonilgʻiga hojat yoʻq.

Odatda respulikamiz issiqxonalarida limon yetishtirish tajribasi ommalashgan. Moʻydinjon Abdurahimov issiqxonasida esa mandarinni yigʻish mavsumi boshlandi.

— Mandarin daraxti 200-yil umr koʻradi, - deydi u. — Tomorqamdagi koʻchatlar 4 yillik boʻlishiga qaramay, moʻl hosil bermoqda. Umuman olganda, bir sotix maydonda 1 tonna meva yigʻishni rejalashtirganmiz.

Bu yil Andijon viloyatidagi mavjud issiqxonalardan 12 ming 623 tonna mahsulot yigʻishtirib olindi. Bu koʻrsatkichda tomorqalarda yetishtirilgan hosillarning ham munosib hissasi bor.

Saminjon HUSANOV, “Xalq soʻzi”.