Foto: EPA

Isroil mudofaa vaziri Yoav Gallant AQSHga tashrifini bekor qildi. Toʻxtatilgan sayohat Isroilning Eronning raketa hujumiga javob qaytarishiga tayyorlanayotgan pallaga toʻgʻri keldi. Vazir AQSH mudofaa vaziri Lloyd Ostin bilan uchrashishi kerak edi.

Pentagon matbuot kotibi bu maʼlumotni tasdiqladi va Isroil Bosh vaziri Binyamin Netanyahu AQSH prezidenti Jo Bayden bilan telefonda gaplashmaguncha va Isroilning Eronga javobini maʼqullamaguniga qadar tashrif toʻxtatilgani haqidagi xabarlarga izoh berishdan bosh tortdi.

Ostin va Gallantning kuchli munosabatlari borligi va ular 80-martadan ortiq gaplashganligi aytiladi. Ostin, shuningdek, Isroil Livanga hujumlarini kuchaytirgani sababli oʻtgan oy Isroilga rejalashtirilgan safarini ham kechiktirgandi.

Avvalroq, Bayden Isroilning Eron yadroviy obyektlariga zarba berishini maslahat bermasligini aytgan edi. Ammo u Tel-Aviv Tehronga munosib javob berish kerak, deb hisoblaydi.

Oʻtgan oy “Hizbulloh” yetakchisi Hasan Nasrullohning oʻlimiga sabab boʻlgan Isroil hujumi haqida AQSHga oldindan xabar berilmagan va Ostin operatsiya haqida faqat Gallant bilan telefon orqali suhbatda xabar topgan. Bu AQSH yaqin ittifoqchisining qarorlariga taʼsir oʻtkazish qobiliyati yoki tayyorligi haqidagi savollarni tugʻdiradi.