Ijtimoiy himoya milliy agentligi 1 million soʻm miqdoridagi bir martalik moddiy yordam pulini kimlar olishi mumkinligi toʻgʻrisida maʼlumot berdi.

Oʻzbekiston Respublikasi Prezidentining 134-qaroriga muvofiq 2025/2026-yilgi isitish mavsumida aholining ehtiyojmand qatlamini qoʻshimcha moddiy jihatdan qoʻllab-quvvatlash maqsadida joriy yilning noyabr oyida quyidagi toifadagi ehtiyojmand oilalarga 1 million soʻm miqdorida bir martalik moddiy yordam ajratiladi.

Ushbu bir martalik moddiy yordam pullari quyidagi oilalarga beriladi:

• “Ijtimoiy himoya yagona reyestri” axborot tizimi orqali bolalar nafaqasi va moddiy yordam oluvchi oilalar;
• “Kambagʻal oilalar reyestri”ga kiritilgan oilalar;
• “mahalla yettiligi” tomonidan shakllantirilgan qoʻshimcha roʻyxatdagi oilalar.

“Mahalla yettiligi” tomonidan qoʻshimcha roʻyxat shakllantirilishida birinchi navbatda quyidagi toifaga kiruvchi oilalar inobatga olinadi:

• boquvchisini yoʻqotgan oilalar;
• oila aʼzolarida I yoki II guruh nogironi boʻlgan shaxslardan iborat boʻlgan oilalar;
• nogironligi boʻlgan bolani parvarishlayotgan oilalar;
• gaz taʼminoti mavjud boʻlmagan va markazlashtirilgan isitish tizimi yoʻq boʻlgan koʻp qavatli uylarda yashovchi oilalar;
• bir xonadonda 3 va undan ortiq oila birgalikda yashovchi oilalar;
• uzoq muddatli davolanishni talab etuvchi ogʻir kasallikka chalingan shaxslar yashaydigan oilalar;
• oʻzgalar parvarishiga muhtoj boʻlgan yolgʻiz yashovchi shaxslar hamda yolgʻiz yashovchi keksalar va nogironligi boʻlgan shaxslar.

“Agar Siz ushbu toifalarga mos kelib ehtiyojmand oila boʻlsangiz joriy yilning 25-sentyabrga qadar «Mahalla yettiligi”ga murojaat qiling», — deyiladi agentlik xabarida.