Joriy yilning 24-noyabr kuni “Taraqqiyot strategiyasi” markazida Markaz ijrochi direktori Eldor Tulyakov hamda Shveytsariyaning Oʻzbekistondagi favqulodda va muxtor elchisi Konstantin Obolenskiy bilan uchrashuv boʻlib oʻtdi.

Samimiy muloqot shaklida boʻlib oʻtgan uchrashuvda Markaz rahbari E.Tulyakov elchi K.Obolenskiyni Oʻzbekistonda amalga oshirilayotgan ichki va tashqi siyosatning mazmun-mohiyati, Harakatlar strategiyasi doirasida amalga oshirib kelinayotgan islohotlarning natijalari, shuningdek “Taraqqiyot strategiyasi” markazining maqsad va vazifalari, faoliyat koʻlami bilan yaqindan tanishtirib oʻtdi.

Shuningdek, uchrashuv davomida tomonlar Shveytsariyaning Oʻzbekistondagi elchixonasi va “Taraqqiyot strategiyasi” markazi oʻrtasidagi ikki tomonlama hamkorlik masalalarini ham atroflicha muhokama qilishdi. Jumladan, ikki mamlakat oʻrtasidagi istiqbolli hamkorlik loyihalarini amalga oshirish, hamkorlikni yanada jadallashtirish masalalariga alohida eʼtibor qaratildi.

Uchrashuv yakunida tomonlar ikki mamlakatning “aql markazlari” oʻrtasida doimiy tajriba almashilishining yoʻlga qoʻyilishidan manfaatdor ekanliklarini taʼkidlab, Shveytsariya va Oʻzbekiston mutaxassislari hamda ekspertlari ishtirokida qoʻshma tadbirlar oʻtkazishga kelishib olishdi.

“Xalq soʻzi”.