Yoʻlovchilarning zamonaviy poyezdlarga boʻlgan talabini toʻla qondirish, shuningdek, ichki turizmni rivojlantirishda qoʻshimcha imkoniyatlar yaratish maqsadida “Oʻzbekiston temir yoʻllari” AJ tomonidan 2021-yil 10-dekabrdan boshlab haftaning juma kuni “Toshkent — Buxoro — Toshkent” yoʻnalishida 770/769-sonli “Afrosiyob” zamonaviy poyezdlarining qatnovi yoʻlga qoʻyiladi.

Mazkur zamonaviy poyezd oʻtgan bir oy mobaynida faqat haftaning shanba va yakshanba kunlari qatnovini amalga oshirib keldi. 10-dekabrdan boshlab haftaning juma, shanba va yakshanba kunlari ertalab soat 09:02 da Toshkent markaziy temir yoʻl vokzalidan harakatini amalga oshiradigan 770-sonli “Afrosiyob” zamonaviy poyezdi Samarqand, Navoiy temir yoʻl vokzallarida ham toʻxtab oʻtib, soat 12:47 da Buxoro 1 temir yoʻl vokzaliga yetib boradi.

Shuningdek, 769-sonli “Afrosiyob” zamonaviy poyezdi ushbu kunlarda soat 15:02 da Buxoro 1 temir yoʻl vokzalidan harakatini amalga oshirib, soat 18:50 da Toshkent markaziy temir yoʻl vokzaliga kirib keladi.

Bugungi kunda qatnovini amalga oshirayotgan “Afrosiyob” zamonaviy poyezdlari esa oʻz harakat jadvali boʻyicha harakatlanadi.