Foto: X/Germaniya mudofaa vazirligi

Germaniya Ukrainaga umumiy qiymati 1,3 milliard yevro boʻlgan yangi harbiy yordam paketini taqdim etmoqda. Bu haqda Germaniya mudofaa vaziri Boris Pistorus Kiyevdagi matbuot anjumanida maʼlum qildi.

RBC-Ukraina xabariga koʻra, yangi paket toʻrtta IRIS-T tizimi, 20 mingta 155 millimetrli artilleriya snaryadi, tankka qarshi minalar va boshqa qurollarni oʻz ichiga oladi.

“Bu oʻtgan qishdan beri beshinchi shunday paket. Va ishonchim komilki, u sizga Rossiya agressiyasiga qarshi kurashingizda yordam beradi”, — dedi Pistorius.

Kiyev uzoq vaqtdan beri soʻrab kelayotgan uzoq masofali “Taurus” raketalarini yetkazib berish ehtimoli haqidagi savolga vazir bu borada yangi maʼlumot yoʻqligini aytdi.

Shu bilan birga, u kelasi yili Germaniya Ukrainaga 155 mm kalibrli 140 mingta snaryad yetkazib berishni rejalashtirayotganini taʼkidladi.

Germaniya harbiy yordam boʻyicha Ukrainaning AQSHdan keyin ikkinchi yirik ittifoqchisi hisoblanadi. Boris Pistorius 21-noyabr kuni, AQSH Mudofaa vaziri Lloyd Ostin Ukrainaga kelganining ertasiga Kiyevga tashrif buyurdi.

Pentagon rahbari Kiyevda “AQSH Ukrainani Rossiya agressiyasiga qarshi erkinlik uchun kurashda – bugun ham, kelajakda ham qoʻllab-quvvatlashda davom etadi”, dedi.

Shu kuni AQSH Mudofaa vazirligi Ukrainaga 100 million dollarlik yangi harbiy yordam paketini taqdim etayotganini eʼlon qildi.