Oʻzbekistonning Dubaydagi (Birlashgan  Arab Amirliklari)  Bosh konsulligida ASHQning «3rd Curve Healthcare” kompaniyasi rahbari, doktor Shadi Shalaxti bilan uchrashuv tashkil etildi.

Unda Oʻzbekistonga xorijiy investitsiya va ilgʻor innovatsion texnologiyalarni jalb qilish masalalari  muhokama qilindi.

Shadi Shalaxti Yangi Oʻzbekistonning sarmoyaviy salohiyati, xorijiy investorlar uchun yaratilgan imtiyozlar, tadbirkorlik faoliyatini  qoʻllab-quvvatlash boʻyicha koʻrilayotgan  chora-tadbirlar bilan batafsil tanishtirildi. 

«3rd Curve Healthcare” kompaniyasi rahbari tibbiyot muassasasi qurish, xalqaro standartlarga javob beradigan tibbiyot kadrlarini tayyorlash bazasini yaratish orqali Oʻzbekiston sogʻliqni saqlash sohasiga sarmoya kiritishga  qiziqish  bildirdi. Shadi Shalaxtining aytishicha, ushbu  loyihalar nafaqat Oʻzbekiston aholisiga xalqaro standartlarga javob beradigan yuqori sifatli tibbiy xizmatlarni olish, balki mamlakatni Markaziy Osiyo mintaqasidagi yirik  tibbiy markazga aylantirish uchun ham sharoit yaratadi.

Boʻlib oʻtgan muzokaralar soʻngida «3rd Curve Healthcare”  kompaniyasi rahbariyatining Oʻzbekistonga biznes missiyasini tashkil etish, tashrif davomida Sogʻliqni saqlash vazirligi va boshqa tashkilot hamda idoralar rahbarlari bilan uchrashib, sarmoyaviy loyihalarni amalga oshirish  masalalarini muhokama qilish boʻyicha kelishib olindi. 

«3rd Curve Healthcare”   kompaniya dunyoning turli mamlakatlarida tibbiyot va sogʻliqni saqlash sohasida investitsiyaviy loyihalarni amalga oshirishga ixtisoslashgan. Kompaniya  AQSH, Buyuk Britaniya, BAA, Saudiya Arabistoni, Turkiya va boshqa mamlakatlarda shifoxonalar qurish va foydalanishga sarmoya kiritgan. U, shuningdek, konsalting xizmatlarining toʻliq siklini, yaʼni investorni tanlash, loyiha konsepsiyasi, tegishli kadrlarni tanlash va oʻqitishgacha boʻlgan jarayonni taqdim etadi.