Foto: Videodan kadr

Namangan viloyati Chust tumanida sodir boʻlgan dahshatli YTH boʻyicha rasmiy tashkilotlar birin-ketin munosabat bildira boshladi. Namangan viloyati Ichki ishlar boshqarmasi Yoʻl harakati xavfsizligi boshqarmasiga koʻra, holat joriy yilning 8-yanvar kuni soat 08:45larda Chust tumani Qorakapa MFY hududidan oʻtgan D-116 “Chust-Axcha-Pop” avtomobil yoʻlining 8-km.da sodir etilgan.

Qayd etilishicha, “Lacetti” rusumli avtomobilni boshqarib ketayotgan haydovchi boshqaruvini yoʻqotgan va yoʻlning qarama-qarshi yoʻnalishiga oʻtib, oʻz yoʻnalishida harakatlanib kelayotgan “Damas” va “Labo” rusumli transport vositalari bilan toʻqnashib ketgan.

Namangan viloyati IIB JXX YHXB Axborot xizmati boshligʻi Botirjon Boymirzayev “Xalq soʻzi” muxbiriga holatning tergovdaligi va vafot etganlar haqida tez orada maʼlum qilinishini bildirdi.

Qayd etish kerakki, turli ijtimoiy tarmoq kanallarida mazkur avariya natijasida 5 kishi vafot etgani aytilmoqda. Shunga qaramasdan, hozircha vafot etganlar haqida rasmiy axborot eʼlon qilinmagan va hozirda holat yuzasidan surishtiruv ishlari davom ettirilmoqda.