Botir MADIYOROV/“Xalq soʻzi”. Yozyovon tumanining “Choʻliguliston” mahalla fuqarolar yigʻini hududida joylashgan 23-umumiy oʻrta taʼlim maktabi bundan 60 yil oldin qurilgan boʻlib, bugungi kunda bilim maskanida 205 nafar kelajagimiz vorislari taʼlim oladi.

Shundan buyon mahallaning kattayu kichigi maktabda sport zali qurilib, oʻgʻil-qizlarning jismoniy barkamolligi uchun sharoitlar yaratilsa, deya orzu qilishadi. Bugun hudud ahlining uzoq yillik orzusi roʻyobga chiqdi.

2024-yili maktab jamoasi ”Tashabbusli byudjet” loyihasida sport zali qurish taklifini kiritib, yakunda gʻolib chiqishgandi. Shu tariqa qisqa fursat ichida 1 mlrd 350 mln soʻm mablagʻ evaziga zamonaviy sport zali qurib bitkazildi.

— Gapning ochigʻi, barcha sharoitlarga ega sport zali boʻlishi maktabda oʻqigan oʻquvchilarning bir necha avlodi ushalmas orzu boʻlib qolgandi, — deydi mehnat faxriysi Azimjon Rahmonov. — Bugun ramziy tasma qirqilib, yangi bino foydalanishga topshirilishi asnosida mahallamizdan mamlakat chempionlari, nufuzli xalqaro musobaqalar gʻoliblari yetishib chiqishiga ishonch bildirildi.