“Bu bizga Yangi yil bayrami sovgʻasi boʻldi”
Foto: "Xalq so'zi"
Ilgari viloyat va tuman markazlaridagina boʻlgan koʻp qavatli turarjoy binolari qurilishi endi olis qishloqlarga ham jadal kirib boryapti. Chunonchi, Namangan viloyati Toʻraqoʻrgʻon shahridan salkam yigirma chaqirim olisda joylashgan “Oʻzbekiston” mahallasida bundan uch yil avval shunday binolarni barpo etishga kirishilgan edi. Oʻtgan davrda har biri 24 ta xonadondan iborat boʻlgan 5 ta imoratga 120 ta oila koʻchib kirdi. Shinam uy-joylar dahasi bu yil yanada kengaydi. Yaqinda 40 xonadonga moʻljallangan yana ikkita besh qavatli bino qurib bitkazildi. Arzon uylarning aksariyati ijtimoiy himoyaga muhtoj, kamxarj oilalarga ajratilmoqda.
— 10 sotixli hovlida uch oila, 11 kishi birga yashab kelardik. Singlim Dilshoda 2-guruh nogironi. Uy soʻrab qilgan murojaatimiz eʼtiborga olinib, mana, alohida xonadonga ega boʻldik. Bu bizga Yangi yil bayrami sovgʻasi boʻldi, — deydi yangi uy egalaridan biri Izzatilla Mirzaumarov.
Yangi uylar taqdimoti tantanali nishonlandi. Shinam boshpanasida bayram dasturxonini yozish tadorigini koʻrayotgan xonadon sohiblariga tuman hokimligining sovgʻalari taqdim qilindi. Bu yoqda esa navbatdagi yana uch bino qurilishi jadallashtirilmoqda.
Qudratilla NAJMIDDINOV, “Xalq soʻzi”.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring