Namangan viloyati Toʻraqoʻrgʻon tumanida yashovchi 23 yoshli (ayol) O.G. IIOga murojaat qilib, “nomaʼlum shaxs” sir saqlanishi lozim boʻlgan maʼlumotlarini oshkor qilish bilan qoʻrqitib, undan pul talab qilayotganligini maʼlum qilgan.

Tezkor-qidiruv tadbirlari natijasida, mazkur jinoyatni Namangan shahrida yashovchi 21 yoshli (erkak) M.A. sodir etganligi aniqlangan.

Gumonlanuvchi M.A. Namangan tumani Qoʻqonqishloq MFY hududida O.G.ning uyali telefon qurilmasini ochiqdan-ochiq tortib olib, agar 1 mln. soʻm pul bermasa, uning “Telegram” messenjeridagi shaxsiy yozishmalari va suratlarini Internet tarmogʻi orqali barchaga tarqatishini aytib, poʻpisa qilganligi maʼlum boʻldi.
Mazkur holat yuzasidan Oʻzbekiston Respublikasi JKning 165-moddasi 1-qismi bilan jinoyat ishi qoʻzgʻatilib, M.A.ning sodir etilib, fosh etilmay qolgan boshqa shu turdagi jinoyatlarga aloqadorligini tekshirish maqsadida tezkor-surishtiruv ishlari olib borilmoqda.

Qonunga muvofiq, Oʻzbekiston Respublikasi Jinoyat kodeksining 165-moddasi 1-qismidagi jinoiy xatti-harakatlar uchun 3 yildan 5 yilgacha ozodlikdan mahrum qilish jazosi nazarda tutilgan.