Ma’lumki,  sud qarori asosida aliment to‘lovlarni o‘z vaqtida amalga oshirish qarzdor shaxsning majburiyati hisoblanadi. Biroq, ayrim hollarda aliment to‘lovchi ishsizligini ro‘kach qilib, oyma- oy farzandi moddiy ta’minotini ta’minlashni orqaga suradi. Mana shunday  holatlarning  oldini olish maqsadida tizimli chora-tadbirlar ko‘rilmoqda. Jumladan, Pop tumanidagi yirik ishlab chiqarish korxonasida tashkil etilgan mehnat yarmarkasiga ko‘plab  ishsiz fuqarolar qatori 12 nafar  aliment to‘lovchi ham taklif etildi.  Unda  tumandagi  27  ta korxona va  tashkilot  o‘zlaridagi 800 dan ortiq bo‘sh ish o‘rinlari bilan ishtirok etdi.  Ish beruvchilar  qatnashchilarni  vakant o‘rinlari, yaratilgan mehnat sharoitlari bilan yaqindan tanishtirdilar.

- Men bir nafar farzandimga sud qaroriga asosan aliment to‘lashim kerak. Lekin, ishsizligim tufayli vaqtida hisob-kitob qila olmayotgan  edim, - deydi Xazratibob mahallasida yashovchi fuqaro Muhammadali Kalonov. - Bo‘sh ish o‘rinlari  yarmarkasiga  davlat ijrochisi tomonidan taklif etilganim yaxshi bo‘ldi. Endi  “Pop mo‘rikon” MCHJda ishlayman. Birinchi navbatda qarzdorlikni bartaraf etaman va oyma-oy farzandim moddiy ta’minotini berib turaman.
 
 O‘tkazilgan yarmarkada yana  10 nafar ishsiz aliment to‘lovchi mehnat jamoalariga qabul qilinib, doimiy daromad manbaiga ega bo‘ldi.

 Ma’lumot  uchun, MIBning Pop tuman  bo‘limi ish yurituvida bugungi kunda 2139 ta aliment bilan bog‘liq hujjatlar mavjud va ularni ijrosini ta’minlash borasida joriy yilning uch  oyi davomida 1 milliard  741 million  so‘m qarzdorlik undirib berildi. Olib borilgan targ‘ibot tadbirlari natijasida 99  ta oilani yarashtirishga erishildi. 44 nafar ishsiz aliment to‘lovchining bandligini ta’minlashga ko‘maklashildi.

Qudratilla NAJMIDDINOV, “Xalq so‘zi”.