“Oʻzbekiston Respublikasida yuridik taʼlim va fanni tubdan takomilashtirish boʻyicha qoʻshimcha chora-tadbirlar toʻgʻrisida” Prezident Farmoni qabul qilindi.

Unga koʻra, 2021/2022 oʻquv yilidan boshlab TDYUU qoshidagi akademik litseyning barcha fanlar boʻyicha yuqori natijalarga ega bitiruvchilari TDYUUga kirish test sinovlarisiz, yakka tartibda suhbat oʻtkazish orqali, toʻlov-kontrakt asosida, qabul parametrlaridan tashqari kirish huquqiga ega.

Hujjatda belgilanishicha:

“Huquq” taʼlim sohasi uchun davlat taʼlim standarti Oliy va oʻrta maxsus taʼlim vazirligi tomonidan Oʻzbekiston Respublikasi Adliya vazirligi bilan kelishilgan holda ishlab chiqiladi va tasdiqlanadi;

TDYUU, yuridik fakultetlar va yuridik texnikumlar professor-oʻqituvchilari va boshqa xodimlari vazirliklar va idoralarning oʻquv, ilmiy-tadqiqot, maʼnaviy-maʼrifiy faoliyati, shuningdek, shartnomalar doirasida koʻrsatiladigan xizmatlardan tashqari boshqa ishlarga jalb etilishi mumkin emas;

asosiy vositalar va tovar-moddiy boyliklarni sotish, pullik kurslarni tashkil etish va boshqa turdagi xizmatlarni koʻrsatishdan tushadigan barcha mablagʻlar, TDYUU va yuridik texnikumlarning rivojlantirish jamgʻarmalarida toʻplanadi, ular mazkur mablagʻlarni mustaqil ravishda tasarruf qiladi;

2020-yil 1-maydan boshlab TDYUU, yuridik texnikumlar va TDYUU qoshidagi akademik litseyning mol-mulkini ijaraga berishdan kelib tushadigan mablagʻlar elektron savdo maydonchasi operatori toʻlovini chegirib tashlagan holda, toʻliq hajmda mazkur muassasalarning rivojlantirish jamgʻarmalariga oʻtkaziladi.