Abdusattorov FIDE Freestyle jahon chempionatida 3-oʻrinni egalladi
Kecha, 15-fevral kuni FIDE Freestyle boʻyicha Jahon Chempionati-2026 final bahslari oʻtkazildi.
Hamyurtimiz Nodirbek Abdusattorov 3-oʻrin uchun germaniyalik Vinsent Keymer bilan bahs olib bordi. Yakunda Abdusattorov 2,5-1,5 hisobida raqibidan ustun kelib, musobaqaning bronza medali hamda 40 000 AQSH dollari miqdoridagi mukofot sohibiga aylandi.
Ahamiyatli jihati shundaki, Nodirbek 3-oʻrinni egallash orqali 2027-yilgi Freestyle jahon chempionatida ishtirok etish imkoniyatiga ham ega boʻldi.
Shuningdek, musobaqaning 7-oʻrni uchun kurashda yana bir yurtdoshimiz Javohir Sindarov AQSH milliy jamoasi sharafini himoya qiluvchi Levon Aronyanga qarshi dona surdi. Sindarov armagedon bahsida raqibiga magʻlub boʻlib, turnirni 8-oʻrinda yakunlagan holda 10 000 AQSH dollari miqdoridagi mukofotga ega chiqqan.
Maʼlumot uchun, FIDE Freestyle boʻyicha Jahon Chempionati-2026 musobaqasida birinchi oʻrin norvegiyalik Magnus Karlsenga, ikkinchi oʻrin esa yana bir AQSH vakili Fabiano Karuanaga nasib etgan.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring