Bu haqda kecha  Oʻzbekiston hukumati delegatsiyasining Yaponiyaga tashrifi doirasida Oʻzbekiston Respublikasi Bosh vazirining oʻrinbosari - investitsiyalar va tashqi savdo vaziri Sardor Umurzoqovning “H.I.S. Holdings” kompaniyasi boshqaruvi raisi hamda Prezidenti Xideo Savada bilan boʻlib oʻtgan muzokaralarda maʼlum qilindi.

Muzokaralarda kompaniyaning Oʻzbekistondagi investitsiyaviy faoliyatining dolzarb masalalari muhokama qilindi. Jumladan, Toshkent shahridagi Abdulla Qodiriy nomidagi bogʻ hududida mehmonxona majmuasini qurish loyihasini amalga oshirishda sezilarli yutuqlarga erishilganligi taʼkidlandi. Mehmonxonaning ishga tushirilishi 2021-yilda kutilmoqda.

Turistik oqimlarni jalb qilish va turistik obyektlardan foydalanish samaradorligini oshirish imkonini beradigan innovatsion texnologiyalar joriy etilgan tegishli infratuzilmani yaratish boʻyicha kompaniyaning ulkan tajribasini hisobga olgan holda tomonlar Samarqand va Buxoro shaharlarida mehmonxonalar qurish boʻyicha yangi loyihalarni amalga oshirish istiqbollarini ham muhokama qildi.

Kompaniyaning moliya sektorini rivojlantirishdagi ishtiroki, xususan, Oʻzbekiston banklaridan birining aksiyalarini sotib olish tashabbusi bilan bilan bogʻliq masalalar koʻtarildi. Tomonlar loyihani amalga oshirish uchun keyingi harakatlarni belgilab, investitsiya qilishning turli mexanizmlarini koʻrib chiqdi.

Uchrashuv yakunlari boʻyicha hamkorlikni yana-da rivojlantirish borasidagi ustuvorliklar belgilab olindi va Yaponiya xolding kompaniyasining Oʻzbekiston bozorida ishtirokini kengaytirish maqsadida birgalikda ish olib borishni davom ettirish boʻyicha kelishuvga erishildi.