АҚШ Президенти Дональд Трамп Рим папаси Лев XIVни танқид қилиб, уни «жиноятчиликка қарши курашда заиф» ва «ташқи сиёсатда даҳшатли» деб атади. Тегишли пост Truth Social ижтимоий тармоғида эълон қилинди.

«Мен Рим папаси Эроннинг ядровий қуролга эга бўлишини нормал ҳолат деб ҳисоблашини хоҳламайман. Мен Рим папаси Американинг Венесуэлага — АҚШга жуда кўп миқдорда гиёҳванд моддалар юборган мамлакатга ҳужумини даҳшатли деб билишини истамайман. Ва мен Рим папаси АҚШ Президентини сайланган мақсадим йўлида қилаётган ишларим учун танқид қилишини хоҳламайман», — деб ёзди республикачи.

Трампнинг фикрича, Лев XIV «фақат америкалик бўлгани учунгина» Рим папаси бўлган ва католик черкови буни «Президент Дональд Трамп билан алоқа ўрнатишнинг энг яхши йўли» деб ҳисоблаган.

«Агар мен Оқ уйда бўлмаганимда, Лев Ватиканда бўлмас эди», — дея қўшимча қилди АҚШ Президенти.

Америка етакчисининг фикрича, Рим папаси «соғлом фикр юритиши, радикал чапларга ёқишга уринишни тўхтатиши ва сиёсатчи эмас, балки буюк Папа бўлишга эътибор қаратиши керак».

Лев XIV Трампнинг танқидидан сўнг ундан қўрқмаслигини билдирди.

«Мен Трамп маъмуриятидан қўрқмайман. У билан баҳсга киришиш ниятим йўқ. Мен Инжил ҳақида гапираман ва урушга қарши чиқишда давом этаман», — деди Рим папаси.

Қайд этиш жоизки, Лев XIV сўнгги ҳафталарда Исроил ва АҚШнинг Эронга нисбатан тажовузи туфайли Яқин Шарқда вазият кескинлашаётганидан хавотир билдириб келаётган эди.