Фото: Халқ сўзи

Алишер Навоий ва Заҳириддин Муҳаммад Бобур ижодига оид 130 дан ортиқ ғазални ёд олиш осон иш эмас.

Қарши туманидаги 43-умумий ўрта таълим мактабининг 9-синф ўқувчилари - Дилбар Қўлдошева ҳамда Дилбар Аҳмадовалар эса бу ишни уддалади.

Республика Маънавият ва маърифат маркази Қашқадарё вилояти бўлими томонидан ташкил этилган «Юз ғазал – юз жавоҳир» танловининг Қашқадарё вилоят босқичида Дилбар Қўлдошева 139 та, Дилбар Аҳмадова эса 136 та ғазални ёддан айтиб бериб, барчанинг эътирофи ва ҳайратига сазовор бўлишди.

— Танловда улуғ шоирларимиз Алишер Навоий ва Заҳириддин Муҳаммад Бобур ижодидан энг кўп ғазал билган иштирокчи ғолиб бўлиши айтилган эди, — дейди Дилбар Аҳмадова. — Бунга қадар 100 та ғазални ёд олган бўлсам, танловга тайёргарлик жараёнида яна 30 дан ошиқ ғазал ёдладим.

Танловда Дилбар Қўлдошева ва Дилбар Аҳмадова 1-ўринга сазовор бўлган бўлса, юзга яқин ғазал ёдлаган Шаҳрисабз туманидаги 26-умумий ўрта таълим мактабининг 8-синф ўқувчиси Заҳро Нўмонжонова 2-ўринни қўлга киритди.

Барча ғолиб ва совриндорларга ташкилотчилар томонидан диплом ва китоблар тўплами топширилди.

Жаҳонгир БОЙМУРОДОВ.