Foto: Xalq so‘zi

Alisher Navoiy va Zahiriddin Muhammad Bobur ijodiga oid 130 dan ortiq gʻazalni yod olish oson ish emas.

Qarshi tumanidagi 43-umumiy oʻrta taʼlim maktabining 9-sinf oʻquvchilari - Dilbar Qoʻldosheva hamda Dilbar Ahmadovalar esa bu ishni uddaladi.

Respublika Maʼnaviyat va maʼrifat markazi Qashqadaryo viloyati boʻlimi tomonidan tashkil etilgan “Yuz gʻazal – yuz javohir” tanlovining Qashqadaryo viloyat bosqichida Dilbar Qoʻldosheva 139 ta, Dilbar Ahmadova esa 136 ta gʻazalni yoddan aytib berib, barchaning eʼtirofi va hayratiga sazovor boʻlishdi.

— Tanlovda ulugʻ shoirlarimiz Alisher Navoiy va Zahiriddin Muhammad Bobur ijodidan eng koʻp gʻazal bilgan ishtirokchi gʻolib boʻlishi aytilgan edi, — deydi Dilbar Ahmadova. — Bunga qadar 100 ta gʻazalni yod olgan boʻlsam, tanlovga tayyorgarlik jarayonida yana 30 dan oshiq gʻazal yodladim.

Tanlovda Dilbar Qoʻldosheva va Dilbar Ahmadova 1-oʻringa sazovor boʻlgan boʻlsa, yuzga yaqin gʻazal yodlagan Shahrisabz tumanidagi 26-umumiy oʻrta taʼlim maktabining 8-sinf oʻquvchisi Zahro Noʻmonjonova 2-oʻrinni qoʻlga kiritdi.

Barcha gʻolib va sovrindorlarga tashkilotchilar tomonidan diplom va kitoblar toʻplami topshirildi.

Jahongir BOYMURODOV.