Самарқанд вилояти Пайариқ туманидаги «Истиқлол» маҳалла фуқаролар йиғинида истиқомат қилувчи ёшлар ўртасида «Ёшлар овози» кўрик-танловининг маҳалла босқичи бўлиб ўтди.

Танлов давомида ёш ўғил-қизлар ўртасида «Заковат» интеллектуал ўйини, футбол, стол тенниси ва шахмат бўйича мусобақалар ҳам ташкил этилди.

Туманнинг Истиқлол маҳалласи ёшлар етакчиси Отамурод Дўсёров ташаббуси билан уюштирилган ушбу тадбирларга 200 нафардан зиёд маҳалла ёшлари қамраб олинди.

Тадбирда Пайариқ туман ҳокими Зафар Эргашев ҳам қатнашиб, ташкил этилаётган мазкур тадбирнинг мазмун-моҳияти ҳақида тўхталди. Шунингдек, мусобақаларда иштирок этаётган барча ёшларга омад тилади.

— Спорт билан машғул ёшлардан ҳеч қачон ёмонлик чиқмайди, — дейди Истиқлол маҳалласи ёшлар етакчиси Отамурод Дўсёров. — Спортга бўлган қизиқиш ёшларни бир даврага жам қила олади, улар орасида дўстлик, ҳамфикрлик ришталарини ҳам мустаҳкамлайди. Шу боис маҳалламизда доимий банд бўлмаган, уюшмаган ёшлар бандлигини таъминлаш билан бир қаторда, уларни спорт билан шуғулланишлари учун ҳам аҳамият қаратмоқдаман. Ҳозирги кунда уюшмаган ёшларнинг аксарияти футбол, стол тенниси, волейбол ва бошқа спорт турлари билан мунтазам шуғулланиб келмоқда.

Танлов ҳамда беллашувлар якунида ғолиб ва совриндорларга эсдалик совғалари топширилди.

«Халқ сўзи».