Вагит Алекперов «Лукойл»дан кетишига нима сабаб бўлгани очиқлади
Фото: РИА «Новости»
Россиянинг «Лукойл» нефть компанияси асосчиси Вагит Алекперов корхона раҳбари лавозимидан кетишини унга нисбатан қўйилган санкциялар билан изоҳлади.
«Буюк Британия ва Австралия санкциялари менга нисбатан жорий қилинганини ҳамма билади. Шунинг учун бу компаниянинг бугунги ривожланишига тўсқинлик қилмоқда. Санкциялар «Лукойл»га эмас, шахсан менга тегишли», дейди Алекперов.
Тадбиркор Россияда қолишини, кетиш ниятида эмаслигини ва ижтимоий лойиҳаларни ишлаб чиқишни режалаштираётганини айтиб ўтди.
Кеча айрим ОАВда «Лукойл» директорлар кенгаши Вадим Воробьевни компания раҳбари вазифасини бажарувчи этиб тайинлангани ҳақида хабар тарқатди. У 20 йилдан бери ушбу компанияда ишлаб келган. Тайинловга қадар Воробьев биринчи вице-президент вазифасини бажарган ва «Лукойл» бошқаруви аъзоси бўлган.
«Лукойл» матбуот хизмати 21 апрель куни компанияси асосчиси ва президенти Вагит Алекперов 29 йиллик меҳнат фаолиятидан сўнг директорлар кенгаши таркибидан чиқишини ҳамда компания раҳбари лавозимини тарк этишини маълум қилган эди.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг