Кеча Президент Эмомали Раҳмон илгари мамлакат парламенти палаталари томонидан қабул қилинган бир қатор қонунларга киритилган тузатишларни имзолади, деб хабар беради Тожикистоннинг «Ховар» ахборот агентлиги.

“Маъмурий ҳуқуқбузарликлар тўғрисидаги кодекси ҳамда Тожикистон Республикаси Жиноят кодексига киритилган ўзгартишлар ва қўшимчалар COVID-19 касаллиги тарқалишининг олдини олиш ва халқ саломатлигини яхшилашга қаратилган, шунингдек, санитария-гигиена ва эпидемияга қарши қоидаларни, шу жумладан карантинни чекловчи чоралар талабларини бузган шахсларга нисбатан жиноий жазо кўзда тутилган”, - дейди «Ховар».

Тасдиқланган ўзгартиришларга кўра, жамоат жойларида ҳимоя ниқобини тақмаган фуқароларга нисбатан 116 сомонийдан 290 сомонийгача (бу 11,6 дан 29 АҚШ долларигача тўғри келади) жарима қўлланилади.

Оммавий ахборот воситалари ва ижтимоий тармоқларда коронавирус пандемияси тўғрисида ёлғон маълумот тарқатган жисмоний шахслар 580 сомонийдан (тақрибан 58 доллар атрофида), юридик шахслар эса – 11, 6 минг сомонийгача (1160 доллар) жаримага тортилади.

Ўзгартиришлар давлат оммавий ахборот воситаларида эълон қилинган кундан эътиборан кучга киради.

Сўнгги бир кун ичида Тожикистонда COVID-19 билан касалланган 51 та янги ҳолат қайд этилган. Мамлакатда ушбу касалликка чалинганлар сони 6159 кишига етган. Шундан 4809 нафари (77,9%) соғайган, 52 бемор вафот этган.