Ижтимоий тармоқларда Тошкент ерусти ҳалқа метросининг «Дўстлик-2» бекатидан «Қўйлиқ» бекатигача бўлган йўналишнинг 4-бекатида ҳосил бўлган дарча ҳақида видео тарқалди.

Ўзбекистон темир йўллари мазкур ҳолат тўғрисида маълумот берди.

Унга кўра, бугунги кунда «Дўстлик-2» – «Қўйлиқ» йўналиши бекатларида кабель учун ўтказиш кўприги (кабелный мостик) қуриш ишлари лойиҳа ҳужжатларига асосан қурилишнинг ИИ-босқичида амалга ошириш режалаштирилган. Электр кабелларини эстакада остки қисмидан ўтказиш иншоотлари қурилиши лойиҳалари ишлаб чиқилиб, ўрнатилган тартибда экспертизадан ўтказилган ва ижобий хулоса олинган. Бугунги кунда бекатларда кабель ўтказиш кўпригини қуриш ишлари амалга оширилмоқда.

Ижтимоий тармоқларда тарқаган «ўпирилиш» метронинг 4-бекатида қурувчилар томонидан 24 февраль куни тунги соат 00:00дан кейин, яъни метро поездлари ҳаракати тўхтатилгандан сўнг, кабель ўтказиш кўпригини қуриш учун махсус ускуна ёрдамида лойиҳа ҳужжатларига асосан бетоннинг бир қисми очилган. Метро эстакадаси остидан ҳаракатланувчи пиёдалар ва автомобиллар хавфсизлигини таъминлаш мақсадида тунги пайтда ишлар ташкил қилиниб, қурилиш меъёр ва қоидалари асосида амалга оширилмоқда ва мутахассислар томонидан назоратга олинган хавфсизлик қоидаларига риоя этилади. Кабель ўтказиш кўприги қурилиши эстакада мустаҳкамлигига зарар етказмайди. Махсус дарча очиш ишлари якунлангандан сўнг йўлдаги чиқиндилар тозаланган.