Фото: Божхона қўмитаси

Пойтахт аэропортида Бишкекдан учиб келган қўшни давлат фуқаросининг жомадонидан синтетик гиёҳвандлик воситалари аниқланди. Бу ҳақда Божхона қўмитаси ахборот хизмати хабар берди.

Маълум қилинишича, мазкур шахс божхонадан «яшил» йўлак орқали ҳаракатланиб, жомадонида 2 та қутига жойланган гўёки спорт озуқаси кўринишидаги 684 дона капсулада 560,75 грамм «alfa-PVP» синтетик гиёҳвандлик моддасини олиб ўтишга уринган вақтида ушланган.

Шундан сўнг мазкур наркожиноятнинг илдизига етиб бориш мақсадида «Тошкент-Аэро» ИБКнинг Контрабандага қарши курашиш шўъбаси томонидан ДХХ ва ички ишлар идоралари вакилларини жалб қилган ҳолда Тошкент шаҳрида тезкор тадбир ўтказилган. Хориждан олиб кирилган ушбу синтетик гиёҳвандлик моддасини қабул қилиб олиши керак бўлган шахс ҳам Бектемир туманида қўлга олинган.

Тадбир давомида унинг ҳам хонадони белгиланган тартибда кўздан кечирилганида, у ерда 114 дона капсулада тахминан 80 грамм оғирликдаги «alfa-PVP» синтетик гиёҳвандлик моддаси ва уларни тарқатиш учун ҳозирланган 37 дона ўрамчалар, 2 грамм оғирликдаги «марихуана», 2 дона ўрамда 30 грамм оғирликда бошқа турдаги синтетик наркотик модда, 4 дона электрон тарози, изоленталар ва зип пакетлар мавжудлиги аниқланиб, далилий ашё тариқасида олинган.