Фото: Melinda Nagy/Shutterstock/FOTODOM

The Sunday Timesʼнинг ёзишича, Британия ҳукумати Исроил Ғазо секторини тўлиқ босиб олишга қарор қилган тақдирда қўлланиладиган янги санкциялар пакетини ишлаб чиқмоқда.

Маълумотларга кўра, бир қатор вазирликларга бундай ҳолатда қўлланадиган жиддий чеклов чораларини тайёрлаш вазифаси юклатилган. Хусусан, Британия Мудофаа вазирлиги Исроил ҳарбийларига мамлакат ҳудудида ўқув курсларида иштирок этишни тақиқлаш имкониятини кўриб чиқмоқда.

Шу билан бирга, Британия ташқи ишлар вазирлиги Биньямин Нетаньяху ҳукуматига Ғазони оккупация қилишнинг йўл қўйиб бўлмас эканини кўрсатадиган бир қатор санкция вариантларини таҳлил қилмоқда. Бош вазир Кир Стармер девони эса бу ҳақда изоҳ беришдан бош тортган.

Эслатиб ўтамиз, июнь ойида Лондон Исроил молия вазири Бецалел Смотрич ва миллий хавфсизлик вазири Итамар Бен-Гвирга қарши санкция жорий этган ҳамда Исроил билан эркин савдо тўғрисидаги битим бўйича музокараларни тўхтатган эди.

Аввалроқ Исроилнинг ҳарбий-сиёсий кабинети Биньямин Нетаньяху таклиф қилган Ғазо шаҳри ҳудудини тўлиқ назоратга олиш ва операцияни кенгайтириш режасини маъқуллаган эди.