Фото: Reuters

Тайван суди ўн кишини, жумладан, амалдаги ва истеъфодаги ҳарбийларни Хитой фойдасига жосусликда айблади.

Орол бош прокурорининг айтишича, уч айбланувчи давлат сирларини йиғиш учун ҳарбий хизматчиларни ёллаган жосуслик тармоғини яратган.

Ҳарбий хизматда бўлган икки аскарга Хитой халқ озодлик армиясига таслим бўлишларини айтадиган видео суратга олиш учун пул тўланган. Тахминларга кўра, Хитой ушбу видеодан психологик уруш учун фойдаланиш ниятида бўлган.

Тайван Мудофаа вазирлиги ва миллий хавфсизлик бўлими Пекиннинг Тайван бўйича разведка маълумотларини йиғиш ҳаракатлари “кенг тарқалган” деб таърифлади.

Аввалроқ, Хитой Халқ Республикаси Давлат кенгашининг ороллар бўйича бошқармаси матбуот котиби Чен Биньхуа Хитой Тайван мустақиллигини қўллаб-қувватлашга қаратилган ҳаракатларга нисбатан “юмшоқлик” кўрсатмаслигини маълум қилганди.

У Пекин Тайван билан тинч йўл билан бирлашиш учун кенг имкониятлар яратишга тайёрлигини таъкидлади, бироқ унинг мустақиллиги уруш дегани, деб огоҳлантирди. Биньхуа, шунингдек, орол аҳолиси унинг мустақиллигига қарши чиқиши ва низолашаётган томонлар ўртасидаги муносабатларни тартибга солишга ҳисса қўшиши керак, деб ҳисоблайди.