Фото: Халқ сўзи

Президентимизнинг 2022 йил 21 июндаги «Педагогик таълим сифатини ошириш ва педагог кадрлар тайёрловчи олий таълим муассасалари фаолиятини янада ривожлантириш чора-тадбирлари тўғрисида»ги фармони асосида Қарши давлат университетининг Педагогика институти негизида Шаҳрисабз давлат педагогика институти ташкил этилди.

— Фармонга биноан янги ташкил этилган Шаҳрисабз давлат педагогика институтининг 2023-2026 йилларда ривожлантиришнинг мақсадли кўрсаткичлари белгиланган, — дейди институтнинг тиллар факультети декани Аҳадхон Муҳаммадиев. — Унга кўра, чет тили фанидан миллий ёки унга мос даражадаги халқаро сертификатга эга профессор-ўқитувчи ва талабалар улушини ошириш, юқори малакали илмий ва илмий-педагог кадрлар тайёрлаш, профессор ўқитувчиларнинг илмий-услубий фаолияти натижадорлигини ошириш бўйича самарали фаолият олиб борамиз.

5 сентябрь куни олий таълим муассасасида 2022-2023 ўқув йили бошланишига бағишланган «Янги Ўзбекистонда эл азиз, инсон азиз» номли маънавий-маърифий тадбир бўлиб ўтди ва унда ўқитувчилар талабаларни мустақиллигимизнинг 31 йиллиги ва янги ўқув йили билан самимий табрикладилар. Дастлабки сабоқлар «Мустақиллик дарси» билан бошланди. .

Эслатиб ўтамиз: институтда 1429 нафар талаба таҳсил олаётган бўлса, уларнинг 962 нафари кундузги бакалавр ва 460 нафари сиртқи таълим йўналишида ўқишмоқда.

Фахриддин БОЗОРОВ, «Халқ сўзи».