Олий Мажлис Сенати Раисининг биринчи ўринбосари Содиқ Сафоев 20 октябрь куни Бағрикенглик ва тинчлик бўйича глобал кенгаш президенти Аҳмад бин Муҳаммад Ал-Жарвон билан мулоқот ўтказди.

Маълумот ўрнида айтиб ўтиш жоиз, Бағрикенглик ва тинчлик бўйича глобал кенгаш 2017 йил 2 ноябрда Малтада ташкил этилган. Кенгашни ташкил этишдан мақсад тинчлик ва бағрикенглик маданиятини юксалтириш, камситиш, диний муросасизлик, миллатчилик каби иллатларга қарши курашиш, тинчликка эришиш учун бағрикенглик тамойилларини мустаҳкамлаш мақсадида ҳуқуқий меъёрларни такомиллаштиришдан иборат. Кенгаш бу борада БМТ ва бошқа халқаро ташкилотлар билан яқин ҳамкорлик қилади.

Суҳбат чоғида Ўзбекистон ва Бирлашган Араб Амирликлари ўртасидаги ҳамкорликнинг юқори ўсиш суръатлари алоҳида таъкидланиб, бунда давлатларимиз раҳбарлари ўртасидаги ўзаро ишончга асосланган муносабатлар ҳал қилувчи ўрин тутаётгани қайд этилди.

А.Ал-Жарвон бағрикенглик ва тинчликни мустаҳкамлаш ғояларини илгари суриш мақсадида асосан миллий парламентлар билан ҳамкорликни ривожлантиришга интилаётган ўзи раҳбарлик қилаётган халқаро нодавлат ташкилот ҳақида маълумот берди.

Мамлакатимиздаги бой маданий-тарихий  мерос ва кўп асрлик бағрикенглик анъаналари, шунингдек, республикада барча соҳаларда рўй бераётган ўзгаришлар  Бағрикенглик ва тинчлик бўйича глобал кенгашнинг Ўзбекистон билан ҳамкорлигини мустаҳкамлашда муҳим омил бўлаётгани таъкидланди.

— Биз Ўзбекистон ҳозирда Марказий Осиёдаги барча жараёнларда етакчи роль ўйнашини ҳам яхши биламиз. Айнан Президент Шавкат Мирзиёевнинг янги ташқи сиёсати ишонч инқирозини енгиб ўтиш имконини берди ва бугунги кунда Ўзбекистон раҳбарининг ғоя ва ташаббуслари атрофида минтақа учун умумий ёндашувлар қурилмоқда, бу эса ташкилотимизнинг мақсадларга хамоҳангдир — дея, таъкидлади А.Ал-Жарвон.

Учрашув якунида Ўзбекистон ва Бағрикенглик ва тинчлик бўйича глобал кенгаш ўртасидаги ҳамкорликни амалий жиҳатдан кенгайтиришга келишиб олинди.