Олий Мажлис Сенати Раиси Танзила Нарбаева стартап лойиҳалари билан шуғулланаётган фаол ташаббускор ёшлар билан учрашув ўтказди.

Самимий ва очиқ мулоқот тарзида кечган учрашувда мамлакатимизда стартап экотизимини ривожлантириш, ёшларнинг инновацион ғояларини қўллаб-қувватлаш ҳамда уларни амалий жиҳатдан рўёбга чиқариш масалалари муҳокама қилинди.

Таъкидланганидек, жорий йил 11 февраль куни Президентимизнинг стартапларни қўллаб-қувватлашга қаратилган 59-сонли қарорининг қабул қилиниши ушбу йўналишда муҳим қадам бўлди. Мазкур ҳужжат нафақат имтиёзлар тизимини кенгайтиради, балки ёшларнинг инновацион ғояларига давлат даражасида ишонч ва катта имкониятлар эшигини очади.

Қарорга мувофиқ 2030 йилга қадар мамлакатимизда фаолият юритаётган стартаплар сонини 5 мингтага етказиш мақсад қилиб белгиланган. Ушбу вазифаларни амалга оширишда қонунчилик органи сифатида Сенатнинг ўрни алоҳида аҳамият касб этади.

Тадбирда HR, таълим ва маркетинг соҳаларида фаолият юритаётган стартапчилар ўз лойиҳаларини тақдим этиб, амалий таклифларини билдиришди. Хусусан, ижтимоий йўналишдаги ҳамда репродуктив саломатликка оид ташаббуслар алоҳида эътиборга олинди.

Шунингдек, стартапчилар дуч келаётган асосий муаммолар, жумладан молиялаштириш, бозорга чиқиш ва бюрократик тўсиқларни қисқартириш масалалари юзасидан фикр алмашилди.

Учрашув якунида Ёшлар парламенти ва стартапчилар ўртасида доимий мулоқотни йўлга қўйиш мақсадида «Digital Leadership Program» (Рақамли етакчилик дастури)ни ташкил этишга келишиб олинди.