Фото: «Халқ сўзи»

Дунё бўйлаб ҳар йили апрель ойининг охирги ҳафтасида жаҳон иммунизация ҳафталиги ўтказиб келинади. Ўзбекистонда ҳам бу тадбир жорий йилнинг 24-30 апрель кунлари кенг нишонланди. Бугун юртимизда олдини олиш мумкин бўлган 13 турдаги юқумли касалликка қарши иммунизация тадбирлари миллий эмлаш календарига асосан амалга оширилмоқда.

Иммунизация ҳафталиги доирасида Самарқанд вилоятида ҳам мавжуд 422 та эмлаш пунктлари барча турдаги вакциналар билан тўлиқ таъминланди. Аҳоли қаерда яшашидан қатьий назар, ҳоҳлаган пунктга мурожаат қилиб эмланиш ҳуқуқига эга.

Самарқанд вилоят Санитария-эпидемиологик осойишталик ва жамоат саломатлиги бошқармаси ахборот хизмати берган маълумотга кўра, ҳафталик доирасида вилоятда Ротавирус инфекциясига қарши “Ротасиил” вакцинаси билан 25.560 нафар, қизамиқ, қизилча, тепкига қарши КПК вакцинаси билан 8233 нафар, қизамиқ ва қизилчага қарши алоҳида КК вакцинаси билан 6796 нафар, пневмококк инфекциясига қарши “Пневмококк” вакцинаси билан 14.885 нафар болалар эмланди.

Шунингдек, полиомиелит касаллигига қарши оғиз орқали ОПВ вакцинаси билан 21.812 нафар, иньекция орқали ИПВ вакцинаси билан 10865 нафар, 5 хил кўк йўтал, буғма, кокшол, ХИБ, вирусли гепатит В касалликларига карши бир иньекция орқали Пентавалент вакцинаси билан 15210 нафар, кўк йўтал, буғма, кокшолга қарши алоҳида АКДС вакцинаси билан 5874 нафар, кокшол, буғманинг ўзига алоҳида АДСМ вакцинаси билан 4934 нафар, одам папиллома вирусига қарши ВПЧ вакцинаси билан 19.586 нафар ўсмир қизлар, вирусли гепатит В касаллигига қарши ВГВ вакцинаси билан 4060 нафар, сил касаллигига қарши БЦЖ вакцинаси билан 4051 нафар чақалоқлар эмланди.

- Иммунизациянинг самараси Самарқанд вилоятида қизамиқ, қизилча, шол, кўк йўтал, кокшол, бўғма касалликлари, 14 ёшгача бўлган болалар орасида вирусли гепатит В касаллиги қайд этилмаяпти, - дейди Самарқанд вилоят Санитария-эпидемиологик осойишталик ва жамоат саломатлиги бошқармаси бош иммунологи Шоира Халилова. - Тепки касаллиги, пневмокок, рото, ХИБ инфекциялар билан касалланиш кескин камайишига эришилди. 2019 йилдан бошлаб, вилоятда 9 ёшли ўсмир қизларимиз бачадон бўйни саратонига қарши ВПЧ вакцинаси билан ҳам эмланмоқда. Апрель ойидан бошлаб вилоятда 40 мингдан ортиқ қизлар эмлаш пунктларида, мактаблардаги тиббий хоналарда 2-тур ВПЧ вакцинаси билан эмланиш ишлари олиб бориляпти. Вилоятда ишлатилинаётган барча вакциналар хавфсизлик сертификатига эга ва ҳар йили ўқитилиб, тайёрланган махсус тиббий ходимлар, яьни вакцинаторлар эмлаш ишларини амалга оширяпти.

Шуни таькидлаш керакки, ушбу вакциналар билан 97 фоиздан юқори хавфсиз эмлаш билан қамраб олиш натижасида Самарқанд вилоятида барқарор эпидемиологик вазият сақланмоқда. Вилоятда профилактик режали ва эпидемиологик кўрсатма асосида эмлаш ишлари давом этяпти.

Абдулазиз Йўлдошев, “Халқ сўзи”.