Самарқанд вилоятида 70 дан ортиқ хориждаги мамлакатлар билан эспорт-импорт шартномалари имзоланган. Эътиборли жиҳати шундаки, айни қиш ойларида ҳам вилоятдан кўпгина қишлоқ хўжалик маҳсулотлари экспортга чиқарилмоқда.

Шундай экспортчилардан бири — Самарқанд туманидаги “Ансоржон агро саховати” фермер хўжалиги Россия Федерациясидаги ҳамкорлар билан тузилган шартнома асосида қишин-ёзин сабзавот маҳсулотларини экспортга чиқармоқда. Шу кунларда ҳам мазкур экспортчи корхона омборхонасида 200 тонна узум, 100 тонна хурмо ва 100 тонна лимон маҳсулотлари экспорт учун тайёр турибди. Шу тумандаги “Вентум қурилиш” МЧЖ га қарашли иссиқхонада ҳам помидор экспортга жўнатилмоқда.

Вилоятда 284 гектар майдонда иссиқхона ташкил этилган. Улардан 425 тонна помидор 323 тонна бодринг, 41 тонна булғор қалампири, 7 тонна кўкат, 206 тонна лимон ҳамда 80 тонна бошқа турдаги маҳсулот олиш мўлжалланган.

— Бу маҳсулотлар белгиланган тартибда карантин назоратидан ўтказилади ҳамда ўсимликлар карантини объектларидан ҳоли эканлиги аниқланган тақдирдагина ички фитосанитар сертификати орқали экспортга йўналтирилади, — дейди Самарқанд вилоят Ўсимликлар карантини ва ҳимояси бошқармаси бошлиғи Шомурод Ўразов. — Бугунги кунда ўсимликлар карантини туман бўлимлари инспекторлари томонидан иссиқхоналарда етиштириладиган помидор, бодринг, булғор қалампири, цитрус ўсимликлар ва бошқа қишлоқ хўжалик экинларининг навлари, агротехникаси ва карантин касалликлари, зараркунанда ҳашаротларга қарши кураш методикаси тадбиркорларга атрофлича тушунтирилмоқда.

Абдулазиз ЙЎЛДОШEВ, “Халқ сўзи”.