Олий Мажлис Қонунчилик палатасининг 2021 йил 27 апрель куни бўлиб ўтган навбатдаги мажлисида халқ вакиллари томонидан «Қимматбаҳо металлар ва қимматбаҳо тошлар тўғрисида»ги қонун лойиҳаси учинчи ўқишда атрофлича кўриб чиқилди.

Қайд этилганидек, қонун лойиҳаси соҳадаги муаммоларни бартараф этиш, уни янги босқичга олиб чиқиш мақсадида ишлаб чиқилган. Ундаги нормалар соҳадаги муносабатларни комплекс тартибга солиш, заргарлик буюмлари асиллик даражасини белгилаш ва тамғалаш тизимини, уларнинг сифатини назорат қилиш тартиб-таомилларини такомиллаштириш, бу йўналишдаги давлат органлари ва бошқа иштирокчиларнинг ваколат ҳамда жавобгарлигини аниқ чегаралаш, тармоқ фаолиятини яширин иқтисодиётдан чиқаришга хизмат қилади.

Қонун лойиҳаси билан қимматбаҳо металларнинг эркин муомаласи йўлга қўйилади. Бу эса, тадбиркорлик субъектларининг хом ашё сифатидаги қимматбаҳо металларга бўлган эҳтиёжини қондиради. Ушбу субъектларга қимматбаҳо металларни ишлаб чиқарувчилардан тўғридан-тўғри ва биржадан сотиб олиш имконияти яратилади.

Депутатларнинг таъкидлашича, лойиҳадаги нормалар асосида қимматбаҳо металларга товар сифатида қаралиб, тадбиркорлик субъекти ёки жисмоний шахслар уларга эгалик қилиш, эркин тасарруф этиш ҳуқуқига эга бўлади. Қимматбаҳо металлар ва тошлардан заргарлик буюмларини ишлаб чиқарувчи маҳаллий тадбиркорлик субъектларига ўз буюмларини ўзлари тамғалаш ҳуқуқи берилмоқда.

Ушбу ҳужжатнинг қабул қилиниши тадбиркорлик субъектларининг заргарлик саноати соҳасидаги фаолиятини жонлантиришга, уларнинг ҳуқуқларини ишончли ҳимоя қилишга, қимматбаҳо металлар ноқонуний айланмасининг олдини олишга ва пировард натижада янги иш ўринларини яратишга хизмат қилади.

Қонун лойиҳаси халқ вакиллари томонидан учинчи ўқишда қабул қилиниб, Сенатга юбориладиган бўлди.