Маълумки, Иккинчи жаҳон урушининг энг қирғинбарот жангларида  мамлакатимиздан 1,5 миллион киши иштирок этиб, 500 мингга яқини ҳалок бўлган, яна қанчаси бедарак кетиб, қанчаси майиб-мажруҳ бўлиб қайтган. Биргина Қашқадарё вилоятидан жанггоҳларда қон кечган 47 мингдан ортиқ ватандошимиз, жумладан, 96 нафар хотин-қизнинг ярмидан кўпи ортга қайтмаган.  Бугунги кунда вилоятда 66 нафар Иккинчи жаҳон уруши қатнашчиси ҳаёт кечирмоқда.

Қарши шаҳридаги "Ватанпарварлар боғи"да бўлиб ўтган "Уч авлод учрашуви" тадбирида Иккинчи жаҳон урушида ҳалок бўлган минглаб юртдошларимиз хотираси ёд этилиб, оловли жанггоҳлардан омон қайтиб, оғир кунларни сабр-бардош билан енгган, машаққатли дақиқаларда ўзлигини йўқотмаган, иймони бутун инсонларга ҳурмат-эҳтиром кўрсатилди.

Учрашувда вилоятнинг турли ҳудудларида истиқомат қилаётган ветеран жангчилар, фронторти меҳнат фахрийлари, ҳарбийлар ҳамда келгусида ҳарбий соҳани эгаллашга аҳд қилган ёшлар, кенг жамоатчилик ва оммавий ахборот воситалари вакиллари иштирок этди.

Давлатимиз раҳбарининг тегишли фармон ва қарорлари асосида ҳар йили Иккинчи жаҳон урушида ҳалок бўлганларнинг хотирасини абадийлаштириш, бугун ҳам сафларимизда туриб, Ватан обрў-эътиборини юксалтиришга, ёшларни маънавий-ахлоқий жиҳатдан тарбиялашга ҳисса қўшаётган фахрийларни эъзозлаш, уларни моддий-маънавий рағбатлантириш бўйича кўплаб тадбирлар амалга ошириб келинмоқда.

- Бу йил насиб этса 100 ёшни қаршиладим. Омон бўлгур бу бош бир аср ичида не кунларни кўрмади. Қишлоқдан 77 киши урушга кетиб, 22 киши қайтганмиз. Урушнинг даҳшатли манзараси, окоп ичида ҳалок бўлган сафдошларимиз, ёниб, вайронага айланган шаҳарлар, завод-фабрикалар, бегуноҳ нобуд бўлган ёш болалар ўша кунлардан хотира бўлиб қолди бизга. Ундай кунлар ҳеч кимнинг бошига тушмасин, ҳеч қачон урушни кўрманглар, тинчликнинг қадрига етинглар, - дейди Қарши туманида яшовчи уруш ветерани Очил бобо Тошев атрофини ўраб олган ёшларга қарата, алланечук хўрсиниб.

"Ватанпарварлар боғи"да жам бўлган кечаги, бугунги ва келажак ватанпарварлари авлоди вакиллари, юртимизда, хусусан, вилоятда амалга оширилаётган бунёдкорлик, ободонлаштириш ишлари, ёшлар эришаётган ютуқлар, фан-таълим янгиликлари, бугунги дориломон кунлар ҳақида дилдан суҳбат қуришди. Уруш қатнашчилари ёшларга бошидан кечирганлари, уруш даври қийинчиликлари ҳақида сўзлаб беришди. Ёшларни юртимизда ҳукм сураётган тинчликнинг қадрига етиш, Ватанимизни кўз қорачиғидек асраш, виждонли ва мард бўлиш, таълим-тарбия олиш учун яратилган шарт-шароитлардан унумли фойдаланишга даъват этдилар.

Хотира ва қадрлаш куни тадбирлари доирасида ўтказилаётган бундай учрашув ва  мулоқотлар корхоналар, ташкилотлар, ўқув муассасалари ҳамда  маҳаллаларда уюшқоқлик билан ташкил этилмоқда.