Россия президенти Владимир Путин «Россия 1» телеканалининг «Москва. Кремль. Путин» кўрсатуви эфирида ўзи коронавирусга топширган тестларининг натижаси манфий чиқаётганини ва ҳар уч кунда тест топшираётганини маълум қилди.

«Ҳар уч ёки тўрт кунда мунтазам равишда тест топшираман», — деган РФ президенти журналистларнинг бу борада берган саволига жавобан.

Тестларнинг жавоби доим манфийми, деган мазмунда берилган саволга у: «Ҳозирча ҳа», — дея жавоб қилди.

Путин интервью давомида пандемия давридаги масофадан туриб ишлаш тартиби ҳақида ҳам тушунтириш берди.

«Дарҳақиқат, маълум даражада бу синов дея оламан, чунки менга одамлар билан мулоқот қилиш ёқади. Одамлар билан тўғридан-тўғри суҳбатдан ички қониқиш ҳосил қиламан», — дейди Владимир Путин.

Путин Коммунаркадаги Қизил ҳудуд касалхонасига боришини айтганида уни бу йўлдан қайтаришга уринишганини ҳам ошкор этди.

«Бу йўлдан қайтаришга уринишган, ҳатто ҳамма ушбу қарорга қарши чиққан. Хўш, нега у ерга бордим? Аввало, у ерда нима қандай жойлаштирилгани, шароит қандайлигини ўз кўзим билан кўришни хоҳладим. Ҳисоботлар орқали маълумот олиш бошқа, ўзинг жойига чиқиб ҳаммаси қандайлигини кўриш бошқа», — дея қўшимча қилган у.

Эслатиб ўтамиз, Путин март ойи охирида Коммунаркадаги касалхонага борган, у ерда бош шифокор Денис Проценко билан учрашганди. Орадан бир неча кун ўтгач Протсенкода коронавирус аниқланганди.