Фото: Олий Мажлис Сенати ахборот хизмати

Жорий йилнинг 4 апрель куни Олий Мажлис Сенати Раиси, Одам савдосига ва мажбурий меҳнатга қарши курашиш миллий комиссияси раиси Танзила Нарбаеванинг “Better Cotton Initiattive” (BCI) халқаро ташкилотининг стандартлар ва сифат кафолати бўйича директори Челси Рейнхард билан учрашуви бўлиб ўтди.

Таъкидлаш жоиз, кейинги 6 ой давомида BCI раҳбарияти ва вакиллари мамлакатимизга бир неча бор ташриф буюришди. Хусусан, ушбу ташкилотининг бош директори Алан Макклей ҳамда менежери Рейчел Беккет билан жуда самарали учрашувлар ташкил этилди. Шунингдек, пойтахтимизда “Better Cotton Initiattive” – экология учун яхшироқ, жамият учун яхшироқ, иқтисодиёт учун яхшироқ, келажак учун яхшироқ» мавзусида халқаро конференция ўтказилди. Натижада республика пахта-тўқимачилик кластерларини янада ривожлантириш, фермер хўжаликлари миқёсида “Better Cotton” тизими стандартларини жорий этиш бўйича чора-тадбирлар ишлаб чиқиш ва кўмаклашишга қаратилган қарор қабул қилинди.

Олий Мажлис Сенатида бўлиб ўтган учрашувда Ўзбекистонда пахта-тўқимачилик кластерлари фаолиятига халқаро стандартларни кенгроқ жорий этиш, шунингдек, пахта етиштириш амалиётини такомиллаштиришда BCI лойиҳаси билан ҳамкорликни ривожлантириш юзасидан фикр алмашилди.

– Биз янги ўсиш нуқталарини белгилаш билан саноатни ривожлантиришга ўтдик. Хусусан, корхоналар фаолиятига жаҳон брендлари талабларига мос келадиган халқаро стандартларни жорий этиш устувор вазифа бўлди. Республика тўқимачилик саноатига халқаро стандартларни жорий этиш ва сифатли амалга ошириш учун Миллий комиссия доирасида BCI стандартларини жорий этиш чора-тадбирларини ўз ичига олган алоҳида «Йўл харитаси»ни қабул қилдик. Қувонарлиси, бугунги кунда ишлаб чиқарувчиларнинг ўзлари уларни амалга оширишдан манфаатдор, чунки айнан пахта саноатида муносиб меҳнат муносабатларини жорий этиш борасида эришилган ютуқлар жаҳон брендларининг Ўзбекистон билан ҳамкорликка қизиқишида асосий омил бўлиб хизмат қилмоқда, дея таъкидлаб ўтди Сенат Раиси.

Маълумот ўрнида қайд этиш жоизки, бугунги кунда 12 та кластер фаолиятида BCI пилот лойиҳаси амалга оширилмоқда ва ташкилотининг қарори билан иккита, яъни «Индорама» ва «Навбаҳор» кластерлари BCI лицензиясини қўлга киритган.

Ўз навбатида, Челси Рейнхард сўнгги йилларда Ўзбекистонда олиб борилаётган прогрессив ислоҳотларнинг ижобий натижаларини шахсан кузатаётганлигини ва бугунги кунда жаҳон майдонида Ўзбекистон пахта-тўқимачилик соҳасига халқаро стандартларни тўлиқ жорий этаётган илғор давлат сифатида бошқа давлатлар учун намуна бўлаётганлигини алоҳида эътироф этди. Шунингдек, Челси Рейнхард Ўзбекистоннинг янги таҳрирдаги Конституциясида болалар меҳнатини тақиқлаш тўғрисидаги қоиданинг мустаҳкамланаётганини юқори баҳолаб, давлатнинг бу масалада қатъий сиёсий иродаси ва ортга қайтмас позициясини олқишлади.

Мулоқотда “Better Cotton Initiattive” раҳбарияти халқаро ташкилотнинг Тошкентда офисини очиш тараддудида эканлигини ва ташкилот билан ҳамкорлик борасида бу минтақанинг барча давлатлари учун марказий штаб бўлиб хизмат қилишини таъкидлади.

Суҳбат давомида халқаро стандартларнинг жорий этилиши ва кластерларга BCI сертификатлари тақдим этилиши Барқарор ривожланиш миллий мақсадларига эришишга хизмат қилиши, муносиб меҳнат шароитларини янада яхшилаш, меҳнат муносабатлари жараёнларининг очиқ ва шаффофлигини таъминлаши ҳамда аҳолининг ижтимоий ҳимоясига қаратилган манзилли чораларни кенгайтиришга муҳим ҳисса қўшиши ҳам таъкидлаб ўтилди.