Ўзбекистон Журналистлар уюшмаси вакиллари Хитойга уюштирган сафари доирасида ушбу мамлакатдаги йирик медиатузилма — “Синьхуа” ахборот агентлиги марказий офисида бўлиб, иш жараёнлари билан танишди.

Агентлик раҳбарияти Ўзбекистон Журналистлар уюшмаси вакилларини илиқ кутиб олиб, “Синьхуа” музейига бошлади. У ерда агентлик тарихига оид экспонат ва энг муҳим маълумотлар билан танишилди. Музейда ўтган 90 йилдан ошиқ давр мобайнида агентлик фаолият олиб борган барча биноларнинг сурати, иш стол-стуллари, фойдаланилган техникалар, таҳрир қилинган айрим материалларнинг асл нусха ва расмлари сақланади.

Маълумотларга кўра, ушбу медиатузилма 1931 йилнинг 7 ноябрь куни Хитойнинг Жиандхи шаҳрида “Қизил Хитой” номи билан иш бошлаган. Олти йилдан кейин ҳозирги номига ўзгартирилган. Айтишларича, музейда сақланаётган, ўз даврида энг замонавий бўлган фотоаппаратни хитойлик машҳур шифокорнинг умр йўлдоши турмуш ўртоғи вафот этганидан кейин, яъни 1940 йил “Синьхуа”га тақдим этган. Шифокор ҳаётлигида инсон ички организмларини операция қилиб келган, касалланган ички аъзоларни, жарроҳлик амалиётларининг муҳим жараёнларини (тиббиётни чуқур ўрганиш мақсадида) фотоаппаратда суратга олган. 

Музей йиллар давомида бойиб, агентлик ҳар томонлама ривожланиб борган. 2016 йилнинг 19 февраль куни ХХР Раиси Си Сзинпин агентлик фаолияти билан танишган, 2021 йил 6 ноябрь куни мазкур медиатузилма иш бошлаганига 90 йил тўлиши муносабати билан табрик йўллаган. Дунёнинг 150 дан ортиқ мамлакатида 182 нафар ходимига эга “Синьхуа” қошида йигирмадан ортиқ газета ва журналлар чоп этиб келинади. Агентлик мухбирлари тайёрлаган матнли, фото ва видеоматериаллар 15 тильда жаҳонга тарқатилмоқда. Музейдан чиқиб, ушбу йирик ахборот агентлиги марказий офисида ходимлар учун яратилган шарт-шароитлар, жиҳозлар, жумладан, энг сўнгги техника ва технологиялар, турли электрон мосламалар ўрнатилган янги медиастудия билан танишилди. 

Кўплаб мамлакатларнинг давлат ва нодавлат медиатузилмалари билан алоқа ўрнатган агентлик масъуллари Ўзбекистон Миллий ахборот агентлиги – ЎзА билан ҳамкорлик келишуви имзоланганини алоҳида таъкидлади. Куннинг иккинчи ярмида Ўзбекистон Журналистлар уюшмаси вакиллари Хитой марказий телевидениеси — “CCTV”га йўл олди. У ерда ўтган учрашувда Ўзбекистон ва Хитой давлат телеканаллари ўртасида ҳамкорликни, хусусан, материаллар алмашиш, биргаликда кўрсатувлар тайёрлашни йўлга қўйиш лозимлиги алоҳида таъкидланди. Ўзбекистон Журналистлар уюшмаси билан Умумхитой Журналистлар ассоциацияси ўртасида имзоланган келишувга биноан ўзбекистонлик тележурналистларнинг Хитой марказий телевидениесида малака оширишига шароит яратиб берилиши маълум қилинди.