Фото: “Dunyo” AA

Шу йилнинг 6-13 февраль кунлари Франциянинг Весул шаҳрида бўлиб ўтган “Халқаро Осиё фильмлари” фестивалида ёш ўзбек кинорежиссёри Шокир Холиқовнинг “Якшанба” (“Sunday”) фильми иккита мукофотни қўлга киритди. Бу ҳақда “Дунё” АА хабар бермоқда.

Фестивалда Яқин ва Ўрта Шарқ, Марказий, Жанубий ва Жануби-Шарқий Осиё давлатларидан 100 дан ортиқ бадиий ва ҳужжатли фильмлар тақдим этилди. Уларни Франциянинг турли минтақаларидан 30 мингдан ортиқ томошабин кўрди.

Ҳиндистон, Эрон, Қозоғистон, Хитой, Корея Республикаси, Таиланд, Ўзбекистон ва Шри-Ланка кино усталари томонидан суратга олинган 9 та фильм асосий танлов доирасида намойиш этилди.

Весул кинофестивалида ёш ўзбек кинорежиссёри Шокир Холиқов томонидан суратга олинган “Якшанба” (“Sunday”) фильмининг премьераси бўлиб ўтди. Кинокартина томошабинларда катта қизиқиш уйғотди ва таниқли эронлик кинорежиссёр ва сценарий муаллифи Моҳсен Махмалбаф раислигидаги халқаро ҳакамлар ҳайъати томонидан муносиб баҳоланди ва “Якшанба” фильми иккита соврин — “Томошабин меҳрини қозонган фильм” номинация бўйича ҳамда кинотанқидчилар мукофотини қўлга киритди.

Кинофестиваль ташкилий қўмитасининг пресс-релизида ёзилишича, кинотанқидчилар халқаро ҳайъатига фильмда ишлатилган график композицияси ва деталлар алоҳида таъсир қилган ва улар “Якшанба” фильмини тақдирлашга қарор қилган. Фильмда чекка қишлоқда тинч-тотув ҳаёт кечираётган чол-кампир ҳаёти юксак маҳорат билан кинотасмаларига муҳрланган.