Бу ҳақда АОКАда бўлиб ўтган брифингда Ўсимликлар карантини давлат инспекцияси ахборот хизмати раҳбари Дурдона Очилова маълум қилди.

Қайд этилишича, бугунги кунда тадбиркорлар 52 та давлатга барча турдаги қишлоқ хўжалиги маҳсулотларини фитосанитария сертификати асосида экспортга юклашлари мумкин.

Шунингдек, 26 та давлатга 99 турдаги маҳсулотлар экспорти учун карантин рухсатномалари мавжуд.

Эндиликда қуритилган олхўри маҳсулотини фитосанитария талаблари асосида Хитойга экспортга юклаш мумкин. Бунинг учун тадбиркорларимиз риоя этишлари лозим бўлган талаблар белгиланди.

2021 йил I чорак якуни бўйича 300 396.0 кг ҳамда 184 375 дона импорт қилинган, шу билан бир қаторда 74 774.4 кг ҳамда 1 942 дона экспортга чиқарилаётган зарарланган ўсимлик маҳсулотлари Ўсимликлар карантини чегара масканлари инспекторлар томонидан тўхтатиб қолинди ва ўрнатилган тартибда йўқ қилинди.

Бугунги кунда импорт қилинаётган маҳсулотларни қадоқлашга бўлган талаб ортгани боис қадоқлаш цехига нисбатан қўйиладиган талаблар ҳақида маълумот бериш мақсадга мувофиқ.

Корхона қуёш ва ёмғирдан етарли даражада ҳимояланган бўлиши лозим.

Корхона бинолари яхши ёритилган бўлиши зарур.

Корхона биноларининг эшик ва ойналари герметик равишда ёпилиши керак.

Қадоқлаш корхоналарини қуриш мумкин бўлмаган ҳолатлар мавжуд:

Бино кимёвий чиқиндилар, радиоактив иншоотлар, этилен ёки газли бирикмалар каби моддалар чиқарадиган саноат жойларига яқин бўлса; 

Зараркунандалар, ҳашаротлар ва кемирувчилар кўпайган жойларда қурилмаслиги мақсадга мувофиқ.