Фото: “Халқ сўзи”

Британиянинг “Times Higher Education” агентлиги томонидан 2023 йил учун эълон қилинган ёш университетлар рейтинги — “Young Universities Ranking”да Наманган муҳандислик-қурилиш институтининг эътироф этилиши жамоа учун ажойиб хушхабар бўлди. Ушбу нуфузли рейтингда ташкил топганига 50 йил ва ундан кам бўлган дунёнинг энг яхши олий таълим муассасалари келтириб ўтилган. Кўрсатилган олий ўқув юртлари таълим, тадқиқотлар, билимлар алмашинуви ва халқаро алоқалар каби 13 та кўрсаткич бўйича баҳоланган.

Таъкидлаш лозимки, “Young Universities Ranking” жорий йилги рейтингидан дунёнинг жами 605 та университет ва институти ўрин олди. Унда Сингапурнинг Нанян технология, Гонконгнинг фан ва технологиялар ҳамда Франциянинг Paris Sciences et Lettres университетларини пешқадамлар қаторида кўриш мумкин. Рўйхатга Ўзбекистондан 12 та олий ўқув юрти киритилган бўлиб, улар орасида Наманган муҳандислик-қурилиш институти тўртинчи ўринда қайд этилган.

— Фаолиятимизнинг халқаро миқёсда баҳоланишининг мустаҳкам асослари бор, албатта, — дейди ОТМнинг илмий тадқиқотлар, инновациялар ва илмий-педагогик кадрлар тайёрлаш бўлими бошлиғи Дилшод Абдуваҳобов. – Биргина илмий тадқиқотлар соҳасидаги ишларни олиб кўрайлик. Давлат грантларидан фойдаланиш борасида 2023 йилнинг ўзида профессор-ўқитувчи ҳамда иқтидорли талабаларимиз томонидан жами 9 та – 2 миллиард 843 миллион сўмлик қийматдаги лойиҳа амалга оширилмоқда. Шу йилнинг биринчи ярмида 21 та диссертация ҳимоя қилиниб, икки ўқитувчимиз профессор, 8 нафари доцент илмий унвонини олди. Бу сингари қувонарли кўрсаткичлар халқаро ҳамкорлик, иқтидорли талабалар билан ишлаш, давлат стипендияларига номзодлар тайёрлаш йўналишларида ҳам яхшиланиб бормоқда.

                                                                        Қудратилла НАЖМИДДИНОВ, “Халқ сўзи”.