Адлия вазирлиги қошидаги Юристлар малакасини ошириш марказида “Коррупцияга қарши курашиш ва комплаэнс назорат” ўқув курси ташкил этилди. Унда Экология вазирлиги марказий аппарати, вазирлик ҳузуридаги Ўрмон хўжалиги агентлиги, Гидрометеорология хизмати агентлиги ҳамда вазирлик ва ҳудудий бўлинмалар ходимлари иштирок этди. 

Курсдан мақсад давлат органлари ва ташкилотлари ходимларига тизимда коррупцияга қарши курашда назарий билимлар беришдир. 

Курс давомида коррупцияга қарши курашиш соҳасидаги давлат сиёсатининг асосий йўналишлари, халқаро ҳужжатлар ва тажриба, коррупциявий ҳуқуқбузарликлар учун жавобгарлик, коррупцияга қарши “комплаэнс-назорат” тизимининг келиб чиқиши, унинг элементлари ва асосий йўналишларига алоҳида тўхталиб ўтилди. 

Маълумот учун, коррупцияга қарши комплаэнс назорати – давлат ва хўжалик бошқаруви органлари, хўжалик юритувчи субъектлар фаолиятини коррупцияга қарши курашиш соҳасидаги халқаро стандартлар, қонун ва бошқа меъёрий ҳуқуқий ҳужжатларга мувофиқ ташкил этувчи, коррупция хавф-хатарлари, манфаатлар тўқнашувини ўз вақтида аниқлаш ва чек қўйиш, қонун бузилиши ва коррупцияга оид ҳуқуқбузарликлар ҳақида хабар беришни ўзида мужассам этган профилактик тизимдир.

Шунингдек, ходимларнинг одоб-ахлоқ қоидалари ва уларга риоя қилмаслик учун жавобгарлик, манфаатлар тўқнашуви тушунчаси ва уни ҳал қилиш чоралари ҳамда бошқа мавзуларга ҳам эътибор қаратилди.

Ўқув курси якунида тингловчиларга махсус сертификатлар топширилди.