Фото: AP

Хитой етакчиси Си Цзиньпин ва Украина президенти Владимир Зеленский ўртасида бўлиб ўтган телефон орқали мулоқот можарони ҳал қилиш йўлидаги муҳим қадамдир. Бу ҳақда Хитой ташқи ишлар вазири Цинь Ган айтиб ўтди. Унинг сўзлари Хитой ташқи ишлар вазирлиги сайтидаги хабарда келтирилди.

Дипломатнинг таъкидлашича, етакчиларнинг мулоқоти Пекиннинг Москва ва Киев ўртасида тинчлик музокараларини бошлашга қаратилган позициясини яна бир бор кўрсатади.

«Инқироз қанчалик мураккаб бўлмасин, уни музокаралар йўли билан ҳал қилиш керак, можаро қанчалик мураккаб бўлмасин, уни фақат сиёсий йўл билан ҳал қилиш керак», дейди дипломат.

Цинь Ган Хитой Украина инқирозига ечим топиш учун барча томонлар, жумладан, Марказий Осиё давлатлари билан ҳамкорликни давом эттиришга тайёрлигига қўшимча қилган.

Аввалроқ, «Politico» Зеленский ва Си Цзиньпин ўртасидаги мулоқот Хитой ва Ғарб ўртасидаги кескинликни камайтириши мумкинлигини ёзган эди. Шу билан бирга, нашрнинг қайд этишича, бу Хитой раҳбарининг Россия президенти Владимир Путин билан дўстона муносабатлар бўйича позициясини АҚШ босимига қаршилик кўрсатишга ўзгартириши даргумон.