Экспертларнинг хавфсизлик борасидаги хавотирларига қарамай Хитой ҳукумати ўзининг ўн минглаб фуқароларини ҳали синовларнинг барчасидан ўтиб улгурмаган вакциналар билан эмламоқда. 

Бу эса бошқа мамлакатларнинг Хитойда яратилаётган вакциналарнинг натижасига қизиқишини орттирмоқда. Хитой июль ойида вакцинадан фавқулодда фойдаланиш дастурини бошлади. Унга кўра, "Sinopharm" вa "Sinovac Biotech" компанияларининг тажрибалардан ўтказилаётган уч турдаги вакциналарини аҳолига етказиб бериш бошланди. "CanSino Biologics"нинг вакцинаси эса июнь ойидаёқ Хитой армиясига берила бошланди.

Коронавируснинг қайта авж олиш эҳтимолини камайтириши ва мамлакатдаги муҳим ишчи кучини ушбу касалликдан ҳимоя қилиши мақсад қилинган мазкур вакциналар ўзига захира яратмоқчи бўлаётган бошқа давлатларнинг эътиборини тортмоқда.

Хитой ҳукумати мамлакатдаги тиббиёт, транспорт ва озиқ-овқат соҳасида фаолият олиб борувчи ишчиларнинг фавқулодда тезкор вакцина билан қачон эмланишини расман эълон қилмади. Лекин ҳозирда "Sinopharm" фавқулодда ишлатиладиган иккита вакцинани ишлаб чиқмоқда, "Sinovac" эса ўн минглаб одамлар ўзининг вакцинасини қабул қилиб бўлганини маълум қилган.

"Ҳозиргача вакцина билан эмланган одамлардан ҳеч бири коронавирусга чалинмади ва вакцинация тизими яхши ишлаб келмоқда. Вакциналарнинг акс таъсири кузатилмаяпти", дейди Хитойнинг касалликларни назорат қилиш ва уларнинг олдини олиш марказининг биологик хавфсизлик бўйича бош мутахассиси Гуйчжен Ву.

Вунинг ўзи апрель ойида коронавирусга қарши эмланган. Ўтган ҳафтада у Хитой бир нечта вакцина ноябрда аҳолига етказиб беришга тайёр бўлишини маълум қилган эди.