Фото: www.google.com

Россия бош вазири Михаил Мишустин Хитой фуқароларининг мамлакат ҳудудига киришини вақтинча тақиқловчи фармойишни имзолади. Фармойиш 20 февраль, пайшанба кунидан бошлаб кучга киради.

Ҳужжатда туризм саёҳатлари, хизмат ва таълим, шунингдек, шахсий мақсадларни кўзлаб Россияга келаётган хитойликларга мамлакат ҳудудига киришига вақтинча тақиқ қўйиш масаласи кўтарилган.

Қарор Хитой Халқ Республикасидаги эпидемиологик вазиятнинг мураккаблашуви туфайли у ердан Россия Федерацияси ҳудудига кўплаб хитойликлар оқими кириб келаётгани билан боғлиқ равишда қабул қилинган.

Россиянинг икки нафар фуқароси ҳам коронавирусга чалинган. Улар Diamond Princess круиз лайнери ичида ушбу вирусни юқтириб олган. Кема гонконглик йўловчида коронавирус аниқланганидан кейин икки ҳафталик карантинга олинган.

Россия коронавирусга қарши кураш доирасида Хитой билан чегарани қисман ёпган, темир йўл қатновларини тўхтатган ва авиақатновларни ҳам чеклаб қўйганди.

Эслатиб ўтамиз, янги турдаги коронавируснинг Хитойда тарқалиши 2019 йилнинг декабрь ойида Хубэй провинциясининг Ухань шаҳрида бошланган. 18 февраль ҳолатига кўра, бутун дунёда 73 минг нафар одам ушбу касалликка чалинган (шундан 72 минг нафари — Хитой ҳудудида вирус билан курашмоқда). Коронавирус келтириб чиқарган пневмониядан вафот этганлар сони 1868 нафарни ташкил қилган.