Ўзбекистон Республикаси Қишлоқ хўжалиги вазирлиги ҳузуридаги Сабзавот, полиз экинлари ва картошкачилик илмий-тадқиқот институти олимлари ҳамда станциялари раҳбарлари, шунингдек, Ўзбекистон — Венгрия картошкачилик илмий маркази ходимлари учун таништириш ўқув семинари бўлиб ўтди.

Семинарни "BIOVERSITY\CIAT" ташкилоти (Колумбия) тадқиқотчиси Мариана Кинтеро олиб борди.

Тадбир «Ривожланаётган мамлакатларда қишлоқ хўжалиги тармоқларини яхшилаш мақсадида қишлоқ хўжалигида маълумотларга асосланган қарорларни қабул қилишни қўллаб-қувватлашнинг интеграциялашган тизимини (e-kakashi) қўллаш бўйича тадқиқотлар» лойиҳаси доирасида ўтказилди.

Ушбу лойиҳанинг асосий мақсади технология ёрдамида тўпланган экологик ва агрономик маълумотларни таҳлил қилиш орқали фермерларга ҳосилдорликни ошириш ва касалликларга қарши курашишда ёрдам беришдан иборат.

Ушбу қурилмалар, иккита дастур ва таҳлилий воситалар ёрдамида атроф-муҳит шароитлари кузатиб борилади ва шароитларни таҳлил қилиш учун агрономик маълумотлар қайд этилади. Бу картошка экинларига таъсир қиладиган экологик шароитларни, ҳосилдорликни оширишни ва касалликларга қарши курашни монитоирнг қилиш имконини беради.

“Биз Тошкентга "Е-kakashi" технологиясини олиб келдик ва картошка экинларига таъсир этаётган экологик шароитларни назорат қилиш учун иккита жойга 6 та қурилма ўрнатмоқчимиз ҳамда таҳлилий воситаларимиз орқали ҳосилдорликни оширишга ҳисса қўшамиз. "Е-kakashi" лойиҳалари Япония Ички ишлар ва коммуникациялар вазирлиги томонидан қўллаб-қувватланади», – деди Колумбиянинг "BIOVERSITY\CIAT" ташкилоти тадқиқотчиси Мариана Кинтеро.

Маълумот учун, 9 — 13 ноябрь кунлари "BIOVERSITY\CIAT" вакиллари доктор Ишитани Манабу ва тадқиқотчи Мариана Кинтеронинг ташрифи чоғида лойиҳани амалга ошириш учун 2 та объекти майдонлари аниқланди. Экин — картошка.

Картошка экинлари таъсир қиладиган экологик шароитларни назорат қилиш учун иккита жойга 6 та «Е-kakashi» қурилмаси ўрнатилади, бу эса ҳосилдорликни ошириш ва касалликларга қарши курашиш имконини беради.