Ўзбекистон Иқтисодиёт ва молия вазирлиги фуқароларни “Ташаббусли бюджет“ доирасида овоз бериш билан боғлиқ фирибгарлик ҳолатларидан огоҳлантирди.

Маълумотларга кўра, ватандошларга норасмий Telegram-ботлар орқали овоз беришда иштирок этганлик учун пул мукофотлари таклиф қилинмоқда. Аслида эса фуқароларга маблағ тўланмайди; вазирликка бу каби ҳолатлар юзасидан юзлаб шикоятлар келиб тушган.

“Учинчи шахслар пул ёки моддий бойликлар ваъда қилиб, лойиҳалар учун овоз тўплайдилар, сўнгра мукофот тўлаш бўйича ўз мажбуриятларини бажармайдилар“, — дейилади хабар матнида.

Идора расмий овоз бериш жараёни фақатгина Open Budget портали, Android ва iOS учун мобил иловалар ҳамда расмий Telegram-бот орқали амалга оширилишини алоҳида таъкидлади. Берилган овозлар учун ҳақ олинмайди ва моддий рағбатлантириш кўзда тутилмаган.

“Мукофот учун эмас, ўзгаришлар учун овоз беринг. Шахсий маълумотларингизни бегоналарга берманг. Фирибгарлар тузоғига тушиб қолманг“, — дея қўшимча қилди вазирлик.

Эслатиб ўтамиз, 2026 йилги “Ташаббусли бюджет“нинг биринчи мавсуми доирасидаги овоз бериш жараёни 20 март куни соат 23:59 гача давом этади.