Айни дамда Индонезиянинг «NET MEDIA» телеканали ижодкорлари Ўзбекистон ҳақида ҳужжатли фильм суратга олишмоқда.

Таъкидлаш керакки, Самарқанд вилояти ҳокими ўринбосари Р. Қобилов бошчилигидаги делегация жорий йилнинг 27 январь – 3 февраль кунлари Малайзия ва Индонезияга ташриф буюриб, Индонезиянинг «NET MEDIA» компанияси билан учрашган ва компания вакилларини Ўзбекистонга таклиф қилган эдилар.

Шу кунларда телеканал ижодкорлари Самарқандда суратга олиш ишларини давом эттирмоқда. Ижодий гуруҳ вилоятнинг диққатга сазовор жойлари, ўзбек халқининг бой тарихи, маданияти, бетакрор табиати ва меҳмондўстлигини кадрларга муҳрламоқда.

Қайд этиш жоизки, бунга қадар индонезиялик ижодкорлар Тошкентда бўлиб, пойтахтимизнинг тарихий-маданий объектлари, истироҳат боғлари, метро бекатлари, бозорлари ва бошқа диққатга сазовор жойлари ҳақида қисқа метражли видеоролик ва фильмлар тасвирга олишди. Жумладан, ижодкорлар «Ҳазрати Имом» ва «Сузук ота» мажмуалари, Ислом цивилизация маркази, «Чорсу» бозори, «Наврўз» боғи, «Янги Ўзбекистон» боғи ва бошқа яна бир қанча объектларига ташриф буюришди.

Маълумот учун, «NET MEDIA» телевидениеси ижодкорлари 1 мартга қадар Бухоро ва Тошкент вилоятларида ҳам тасвирга олиш ишларини режалаштиришган. Бундан мақсад юртимизнинг туризм салоҳияти ва брендини дунё бўйлаб кенг тарғиб қилиш ҳамда хорижий сайёҳлар эътиборини Ўзбекистонга кўпроқ жалб қилишдир.