Фото: Иллюстратив сурат

Ҳиндистон оммавий ахборот воситалари йўталга қарши сиропи Ўзбекистонда болалар ўлимига сабаб бўлишда гумон қилинаётган “Marion Biotech” компанияси билан боғлиқ вазиятни ёритишда давом этмоқда.

“Hindustan Times” газетаси Ҳиндистон Дори-дармон воситалари стандартларини назорат қилиш марказий ташкилоти (Central Drugs Standard Control Organization - CDSCO) шанба куни маҳсулотлари сифат талабларига жавоб бермагани боис “Marion Biotech” фармацевтика компаниясининг лицензиясини бекор қилишни тавсия қилгани ҳақида хабар тарқатди.

Нашр дори-дармон воситалари бўйича инспектор Ваибҳав Баббанинг “CDSCO лицензия берувчи идора – Дори-дармонларни назорат қилувчи департаментга мазкур компания лицензиясини бекор қилишни тавсия қилди. Биз ҳозир ҳужжатларни текшириб чиқяпмиз ва жараённи бошлаб юбордик», деган сўзларини келтирган.

Rediff нашри эса “Marion Biotech” компанияси билан боғлиқ суриштирувлар кетаётган бир пайтда мамлакатнинг бошқа штати - Маҳараштра ҳукумати ушбу ҳудудда йўталга қарши сироплар ишлаб чиқаришга ихтисослашган олтита фирма фаолиятини вақтинча тўхтатиб қўйганини маълум қилди.

Маҳараштра озиқ-овқат маҳсулотлари ва медикаментлар сифатини санитар назорат қилиш бўйича бошқармаси вазири Санжай Ратод штат Қонунчилик Ассамблеясининг 3 март кунги мажлисида бу ҳақда сўзлаб берган.

Вазирнинг сўзларига кўра, Маҳараштра ҳукумати штатдаги 108 та йўталга қарши сироп ишлаб чиқарувчилардан 84 тасига нисбатан суриштирув бошлаган. Тўртта фирмага ишлаб чиқаришни тўхтатиш бўйича топшириқ берилган, олтита компаниянинг лицензияси вақтинча тўхтатилган. Шунингдек, 17 та фирмага қоидалар бузилгани ҳақида расмий огоҳлантириш тақдим қилинган.

Санжай Ратоднинг айтишича, штатдаги аллопатик дори-дармонлар ишлаб чиқаришга ихтисослашган 996 та компаниянинг 514 таси ўз маҳсулотларини экспорт қилади.