Фото: Хасан Пайдоев / “Халқ сўзи”

27 октябрь куни Самарқанд шаҳрида МДҲ Ёшлар парламентлараро ассамблеясининг (ЁПА) ўн тўққизинчи мажлиси бўлиб ўтди. Ёш парламент аъзолари МДҲ Парламентлараро Ассамблеяси кузги сессиясининг асосий тадбирлари – Ассамблея Кенгаши мажлиси ва унинг 54-ялпи мажлиси арафасида тўпланди.

“NEET ёшлари” муаммосини ҳал қилиш мажлисда асосий масалалардан бири бўлди. МДҲ парламентлари аъзолари ёшлар ўртасидаги ишсизликни қонунчилик йўли билан тартибга солиш орқали ҳал этиш ҳамда Ҳамдўстлик мамлакатларида ишламайдиган ва ўқимайдиган ёшларнинг ижтимоий-иқтисодий фаоллигини ошириш усуллари хусусида ўз тажрибалари билан ўртоқлашди.

Масала муҳокамасида Озарбайжон, Арманистон, Беларусь, Қирғизистон, Россия, Тожикистон ва Ўзбекистон вакиллари иштирок этди.

Ўзбекистон Республикаси Олий Мажлиси Қонунчилик палатасининг Коррупцияга қарши курашиш ва суд-ҳуқуқ масалалари қўмитаси аъзоси Муҳаммад Валиев Ўзбекистоннинг ҳозирги босқичда ёшлар парламентлари тузилмаларини ривожлантириш тажрибаси борасида маълумот берди. Хусусан, М. Валиев Ўзбекистон Сенати ва Қонунчилик палатаси ҳузурида ёшлар парламентлари ташкил этилгани ва фаол равишда фаолият юритаётганини таъкидлади. Ёшлар парламентларининг мақсади – мамлакат ёшларини қўллаб-қувватлаш, уларнинг ҳуқуқий онги ва саводхонлигини ошириш, ёшларни жамиятнинг сиёсий фаол қатламига айлантириш ва уларнинг сиёсий-ҳуқуқий билим ва кўникмаларини амалда бойитиш, қонун ижодкорлиги ва қонун ижодкорлиги жараёнларига ёшларни кенг жалб қилиш, шунингдек, қабул қилинган қонунларни ёшлар ўртасида, уларнинг парламентдаги фаолиятида кенг тарғиб қилишдир.

Ёш қонун чиқарувчилар ёшларнинг халқаро ҳамкорлигини фаол қўллаб-қувватламоқда. ЁПАнинг сайёр сессиясини Ўзбекистонда ўтказиш бу йўналишдаги навбатдаги қадам бўлиб хизмат қилади.

Ёшлар ассамблеяси иштирокчилари томонидан жорий йилдаги иш якунлари ҳам сарҳисоб қилиниб, МДҲ ЁПАнинг янги координатори сайланди – эндиликда Ассамблеяга раислик қилиш Озарбайжондан Арманистонга ўтди.

Ёш парламент аъзолари “Ёшларнинг халқаро ҳамкорлигига қўшган ҳиссаси учун” фахрий нишон билан тақдирлаш учун тақдим қилиш ҳақидаги таклифларни ҳам кўриб чиқди. Мукофот ёшлар қаноти ташаббуси билан МДҲ Парламентлараро Ассамблеяси Кенгаши томонидан таъсис этилган.

“Халқ сўзи”,
Фото: Хасан Пайдоев / “Халқ сўзи”.