Фото:ТАСС

Германияда коронавирусга қарши тўлиқ эмланганлар эмланмаганлар сонидан ошди. Бу ҳақда “N-tv” хабар бермоқда.

Манбага кўра, мамлакатда 35,4 миллион киши ёки жами аҳолининг 42,6 фоизи коронавирусга қарши вакцинанинг икки дозасини олиб бўлган.

Германия соғлиқни сақлаш вазири Йенс Шпаннинг маълум қилишича, айни пайтда немисларнинг 41,5 фоизи вакцина олмаган.

Манбага кўра, ҳозирга қадар Германияда 48,6 миллион киши (аҳолининг 58,5%) вакцинанинг камида битта компонентини олган. Масалан, сўнгги бир кунда 221 720 киши вакцина қабул қилган.

Мамлакатда коронавирусга қарши эмлаш ўтган йилнинг охирида бошланган эди. Бу ерда “BioNTech” ва “Pfizer”, “Moderna”, “Johnson & Johnson” ва “AstraZeneca” компаниялари томонидан ишлаб чиқарилган вакциналардан фойдаланиляпти.

Аввалроқ, Исландия коронавирус инфекциясининг тарқалишига қарши курашиш учун ўтган йилнинг март ойида жорий қилинган барча ички чекловларни бекор қилган эди. Чунки мамлакатда ёши катта аҳолининг 87 фоизи “COVID-19”га қарши вакцинасининг биринчи дозасини олиб бўлган. Аҳолининг тахминан 60 фоизи эса тўлиқ эмланган.